Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 319 Hüküm no: 361 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un, kocası Ömer b. Kâmil’in küfretmesiyle boşanmış olduğundan mehrini talep ettiği Mahmiye-i İstanbul’da Mahmud Paşa mahallesi sâkinelerinden Fâtıma bt. Yusuf nâm hâtun meclis-i şer‘-i hatîr-i lâzımü’t-tevkīrde zevc-i dâhilün-bihâsı Ömer b. Kâmil nâm kimesne mahzarında üzerine da‘vâ ve takrîr-i kelâm edip mezbûr Ömer târih-i kitâbdan bir gün mukaddem bre dînini îmânını sikdiğim deyû bana şetm etmekle mezbûr Ömer’den ben mübâne olmuşumdur suâl olunup zimmetinde mütekarrir ve ma‘kūdun-aleyh olan bin akçe mehr-i müeccel-i müsemmâmın alıverilmesi matlûbumdur dedikde, gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda udûl-i ricâl-i müslimînden olup mahmiye-i mezbûrede Nahılbend mahallesi sâkinlerinden Ahmed Bey b. Osman ve Ramazan Bey b. Sefer nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka mezbûr Ömer zevcesi müdde‘iyye-i mezbûreye târih-i kitâbdan bir gün mukaddem bizim huzûrumuzda bre dînini îmânını sikdiğim deyû şetm etmekle mezbûre Fâtıma merkūm Ömer’den mübâne olmuşdur biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettikde gıbbe’t-ta‘dîl ve’t-tezkiyye şehâdetleri makbûle olmağın mûcebince müdde‘iyye-i mezbûrenin beynûnetine ba‘de’l-hükm mehr-i müeccel-i müsemmâsı olan meblağ-ı mezkûr bin akçeyi müdde‘iyye-i mezbûreye edâ ve teslîme mezbûr Ömer’e ba‘de’t-tenbîh mâ hüve’l-vâki‘ bi’l-ibtigā ketb ve imlâ olundu. Fî selhi Cumâdelâhire li sene seb‘a ve seb‘în ve elf min hicreti men lehü’l-izzü ve’ş-şeref. Şuhûdü’l-hâl: Es-Seyyid Mehmed Bey b. es-Seyyid Receb el-Bevvâb, umdetü’l-emâsil ve’l-akrân Şaban Ağa b. Süleyman Kethüdâ-yı muhzırân, İbrahim Çelebi b. Ahmed, Mehmed Çelebi b. Abdullah Kethüdâ-yı muhzırân, Şükrullah Bey b. Mustafa, Gazanfer Bey b. Tevekkül ve gayruhüm mine’l-huzzâr.