Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 63 Hüküm no: 38 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sadrazam merhum Eğriboyunlu Mehmed Paşa Vakfı’ndan talep olunan miras hakkının reddi Fi’l-asl vilâyet-i Anadolu’da Erzurum sancağına tâbi‘ Adros kazâsı a‘mâlinden Kılıçlı nâm karye sükkânından olup sâbıkan sadr-ı a‘zam olup bundan akdem medîne-i Hazret-i Ebâ Eyyûb el-Ensârî’de Şahsultan mahallesi sâkinlerinden iken vedâ‘-ı âlem-i fânî eden Eğri boyunlu Mehmed Paşa vâlidesinin li ebeveyn kız karındaşı oğlu ve zî-rahm cihetinden vârisi idiğini lede’ş-şer‘i’l-hatîr isbât eden fahrü’l-emâsil ve’l-a‘yân Mustafa Ağa b. Ahmed huzûr-ı kāimmakām-ı sadr-ı a‘zamîde akd olunan meclis-i şer‘de medîne-i mezbûrede vâki‘ olan beytülmâl-i âmme ve hâssa-i hazret-i müşârun-ileyh evkāfına hâsıl kayd olunmağla menzil-i câi’z-zikre vâzı‘ü’l-yedi idiği ikrârı ile sâbit olup hazret-i mûmâ-ileyh evkāfına bi’l-fi‘l mütevellî olan sâhibü’l-kitâb -kıdvetü’l-emâcid ve’l-e‘âlî- Ali Ağa mahzarında üzerinde da‘vâ ve ve takrîr-i kelâm edip mûrisim paşa-yı merhûm-ı mezbûr muhallefâtından zikr olunan Şahsultan mahallesinde yine kendi sâkine olduğu menzilin dâhiliyesi ki bir tarafı Hüsrevzâde Efendi Vakfı ve bir tarafı sâhil-i bahr ve bir tarafı Haremeyn Vakfı ve bir tarafı Şahsultan Câmi‘-i Şerîfi’ne giden tarîk-i hâs ile mahdûd ve beş bâb fevkānî odaları ve üç sofa ve bir fevkānî kileri ve kenîfi ve dört bâb tahtânî odaları ve matbah ve bir tahtânî kiler ve sofa ve zât-ı eşcâr-ı müsmire ve gayr-ı müsmire bahçeyi ve mâ’-i cârîden hissesini ve kenîfi müştemil menziline mütevellî-i mezbûr bi gayr-ı vech vaz‘-ı yed eder suâl olunup kasr-ı yedine tenbîh olunmak matlûbumdur deyicek gıbbe’s-suâl mütevellî-i mezbûr cevâbında müteveffâ-yı mezbûr Mehmed Paşa hâl-i hayâtında ve kemâl-i akl-ı sıhhatinde hudûd-ı mezkûr ile mahdûd dâhiliye menzilini cemî‘ tevâbi‘i ile ba‘de’t-tahliye ve’l-ifrâz halîlesi olup bilâ vâris fevt olan Ayşe Hâtun bt. Abdullah’a hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve temlîk ve tesellüm ve merhûm-ı mezbûrdan sonra müddet-i hayâtında zabt ve mâlikâne mutasarrıfa olmağın ba‘de vefâtihâ vakf-ı şerîf için bi’l-velâye zabt u kabz eylemişdir hattâ hâl minvâl-i muharrer üzre olduğunu mezbûr Mustafa Ağa muvâcehesinde vech-i şer‘î üzre isbât dahi eylemişdir deyicek isre’l-istintâk mezbûr Mustafa Ağa cevâbında fi’l-hakīka hâl, mütevellî-i mezbûrun bast eylediği minvâl üzredir lâkin hibe-i mezkûrede tahliye ve takās bulunmamağla hibe-i mezbûrenin fesâdına binâen taleb ederim deyicek mütevellî-i merkūm istintâk olundukda husûs-ı mezbûra şehâdet eden şuhûd-ı mezbûr Mustafa Ağa mahzarında merhûm-ı mezbûr paşanın zikr olunan dâhiliye menzili ba‘de’t-tahliye ve’l-ifrâz ve nasb-ı alâmâti’l-fâsıla zevcem Ayşe Hâtun’a hibe ve temlîk ve teslîm ol dahi meclis-i hibede ittihâb ve temellük ve tesellüm ve kabûl ve kabz eyledi deyû ikrârına hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri indinde şehâdet etmeleriyle menzil-i mezbûr cânib-i vakfa hükm olunmuşdur deyicek isre’s-suâl ve’l-ikrâr mezbûr Mustafa Ağa mütevellî-i mezbûra bî-vech ta‘arruzdan men‘ birle kayd şud. Fî 25 min Şa‘bân sene 1081. Şuhûdü’l-hâl: Receb Çavuş Kethüdâ-yı Çavuşbaşı, Hüseyin Çelebi Kethüdâ, Hüseyin b. Ali, Mehmed b. Eyüb, Ali b. Abdullah.