Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 65 Hüküm no: 40 Orijinal metin no: [9b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İrvine bt. Yorgo’nun Diyene v. Aleksi’ye mülk satışı Havâss-ı Aliyye kazâsına tâbi‘ Bergos nâm karye sâkinelerinden İrine bt. Yorgo nâm nasrâniye meclis-i şer‘-i şerîfde zevci râfi‘ü’l-kitâb Diyene v. Aleksi nâm zimmî muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Argiri zimmî mülkü ve bir tarafı Pepo zimmî mülkü ve bir tarafı Yani zimmî mülkü ve bir tarafı harman yeri ile mahdûd iki bâb tahtânî oda ve havluyu müştemil mülk menzilimi cemî‘ tevâbi‘ ve levâhıkı ile zevcim mezbûr Diyene’ye üç bin fıddî râyic fi’l-vakt akçeye bey‘-i sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr üç bin akçeyi yedinden bi’t-tamâm ahz u kabz eyledim. Min ba‘d menzil-i mahdûd-ı mezkûrda alâkam yoktur. Zevcim mezbûr Diyene’nin mülk-i müşterâsı olmuşdur dedikde gıbbe’t-tasdîk kayd şud. Fî 28 min Şa‘bân sene 1081. Şuhûdü’l-hâl: Dimitri v. Nikola, Dimitri v. Mataş, Kurlu v. Razi, Yani v. İstati