Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 65 Hüküm no: 41 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Panayot’un üç oğlu ile üç kızına mülk bağışı Husûs-ı âti’l-beyânı mahallinde tahrîr için savb-ı şer‘-i kavîmden bi’t-taleb Mevlânâ Mustafa Efendi irsâl olunup ol dahi zeyl-i rakīmde muharrerü’l-esâmî kimesneler ile Havâss-ı Aliyye kazâsına tâbi‘ Safra nâm karyede sâkin Hürmüz v. Yani nâm zimmînin menziline varılıp akd-i meclis-i şer‘î olundukda karye-i mezbûre sâkinlerinden Yani v. Panayot nâm zimmî meclis-i ma‘kūd-ı mezkûrda râfi‘ü‘s-sifr sulbî kebîr oğulları Hürmüz ve Mendel ve Doroş ve sulbiye kebîre kızları Belohorye ve Yerona ve Avye muvâcehelerinde ikrâr ve takrîr-i kelâm edip hibe-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Trandafilo mülkü ve bir tarafı Todori mülkü ile ve iki tarafı tarîk-i âm ile mahdûd iki bâb fevkānî oda ve bir sofa ve altında ahır ve havluyu müştemil mülk menzilimi ba‘de’t-tahliye cemî‘ tevâbi‘ ve levâhıkı ve yine karye-i mezbûrede vâki‘ lede’l-ahâlî ma‘lûmü’l-hudûd bir kıt‘a bağımı bi cümleti’t-tevâbi‘ ve’l-levâhıkıda bir hisseyi ifrâz ve alâmet-i fâsıla vaz‘ eylediğimden sonra oğullarım mezbûrûn ve kızlarım mezbûrâna hibe-i sahîha-i şer‘iyye ile hibe ve temlîk ve teslîm edip onlar dahi meclis-i hibede her biri birer hisseyi ittihâb ve temellük ve kabz edip, menzil-i mahdûd-ı mezkûr ve bağ-ı merkūmda alâka ve medhalim yoktur oğullarım mezbûrûnun mülk-i mevhûbeleri olmuşdur deyicek gıbbe’t-tasdîk vâki‘ hâli mahallinde tahrîr ba‘dehû meclis-i şer‘a gelip inhâ ve takrîr etmeğin kayd şud. Fî 3 min Receb sene 1081. Şuhûdü’l-hâl: Mehmed [b.] Eyüb, Ali [b.] Abdullah, Hüseyin [b.] Hasan, Hüseyin [b.] Hasan, Yorgi [v.] Yanaki, Yani [v.] Rali, Lambri [v.] Panayot, Serkis [v.] Doni.