Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 66 Hüküm no: 42 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Panayot’un vârisleri arasındaki nizaın izâle olması Havâss-ı Aliyye kazâsına tâbi‘ Safra nâm karyede sâkin iken bundan akdem hâlik olan Yorgi v. Panayot nâm zimmînin verâseti zevce-i metrûkesi Zafiri bt. İlya nâm nasrâniye ile sulbî kebîr oğulları Rali ve Kosta ve Panayot nâm zimmîlere ve sulbiye kebîre kızları Carine ve Trandafilo ve Kirano ve İrine nâm nasrâniyelere münhasıra olduğu şer‘an zâhir ve müte‘ayyin oldukdan sonra mezbûre Carine tarafından sulh-ı âti’l-beyânı ikrâra vekîl olup vekâleti mezbûrenin zâtını ma‘rifet-i şer‘iyye ile ârifân olan Hürmüz v. Yani ve Yorgi v. Şiro şehâdetleriyle hasm-ı şer‘î-i câhid mahzarında şer‘an sâbite olan zevci Eskile v. Yasef nâm zimmî meclis-i şer‘de metrûkât-ı âti’z-zikre vâzı‘ü’l-yedi idiğini ikrârları ile sâbit olan vâlidesi mezbûre Zafiri ile karındaşlarım mezbûrân Rali ve Kosta ve Panayot muvâcehelerinde bi’l-vekâle ikrâr ve i‘tirâf edip zevcem müvekkile-i mezbûre Carine’nin mûrisi babası hâlik-i mezbûr Yorgi metrûkâtına vâlidesi mezbûre ile karındaşları mezbûrûn Rali ve Kosta ve Panayot zabt ve vaz‘-ı yed edip zevcem müvekkile-i mezbûre hisse-i şer‘iyyesini taleb eylediğinde ekser-i eşyâyı ketm ile cevâb verdiklerinde münâza‘ât-ı kesîre ve muhâsamât-ı şedîde vâki‘ olmuşdu el-hâletü hâzihî beynlerinde muslihûn tavassut edip mevâni‘den ârî şerâit-i sıhhat-i sulhu hâvî, tehârüc-i şer‘î vechi üzre zevcem müvekkile-i mezbûre ile vâlidesi mezbûre Zafiri ve karındaşları merkūmûn Rali ve Kosta ve Panayot’u elli kıt‘a esedî guruş üzerine inşâ-i akd-i sulh eylediklerinde ol dahi sulh-ı mezbûru kabûl ve bedel-i sulh olan mezbûrü’n-na‘t elli esedî guruşu yedlerinden bi’t-tamâm alıp kabz edip min ba‘d babamız hâlik-i mezbûrun muhallefâtından bi’l-irsi’ş-şer‘î bana isâbet eden hisse-i şer‘iyyeme müte‘allik cemî‘ da‘vâdan mezbûre Zafiri ve karındaşlarım mezbûrûn Rali ve Kosta ve Panayot’un zimmetini ibrâ ve iskāt eyledim gıbbe’t-tasdîk kayd şud. Fî 22 min Şa‘bân sene 1081. Şuhûdü’l-hâl: Siyavuş Çavuş el-Mübâşir, Hüseyin b. Ali, Mehmed b. Mahmud, Hasan b. Abdullah, Dilaver el-muhzır.