Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 320 Hüküm no: 362 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ali Beşe b. Abdullah’ın çocuklarının vesayetinin Mustafa Çelebi b. Mehmed’den alınarak Sâliha bt. Abdullah’a verilmesi Mahrûse-i Galata müzâfâtından Tophâne’ye tâbi‘ kasaba-i Fındıklı’da Selime Hâtun mahallesinde sâkin iken bundan akdem vefât eden Ali Beşe b. Abdullah’ın zevce-i metrûkesi Sâliha bt. Abdullah nâm hâtun meclis-i şer‘-i şerîf-i lâzımü’t-teşrîfde müteveffâ-yı mezbûrun evlâd-ı sıgārı Ahmed ve Mustafa ve Mehmed’in tesviye-i umûrları için taraf-ı şer‘-i şerîfden vasî nasb ve ta‘yîn olunmağla tereke-i müteveffâ-yı mezbûrdan sıgār-ı mezbûrûnun hisselerini kabz eden Mustafa Çelebi b. Mehmed nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr hayâtında sıgār-ı mezbûrûna beni vasiyy-i muhtâr nasb ve ihtiyâr edip ben dahi vesâyet-i mezbûreyi kabûl etmekle sıgār-ı mezbûrûnun tereke-i müteveffâ-yı mezbûrdan hisselerini mezbûr Mustafa Çelebi’den alıp hıfz murâd ettiğimde mezbûr Mustafa Çelebi teslîmden imtinâ‘ eder suâl olunup tereke-i müteveffâ-yı mezbûrdan sıgār-ı mezbûrûnun hisselerini bana teslîme mezbûr Mustafa Çelebi’ye tenbîh olunmak matlûbumdur dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda mahalle-i mezbûre sükkânından Hasan b. Abdullah ve Ramazan b. Selim ve Ahmed b. Mustafa nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr hayâtında sıgār-ı mezbûrûna bizim huzûrumuzda müdde‘iyye-i mezbûreyi vasiyy-i muhtâr nasb ihtiyâr edip müdde‘iyye-i mezbûre dahi kabûl etmiş idi, biz [bu] husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup mûcebince müdde‘iyye-i mezbûrenin vesâyetine hükm olundukdan sonra tereke-i müteveffâ-yı mezbûreden sıgār-ı mezbûrûna hisselerini müdde‘iyye-i mezbûreye teslîme merkūm Mustafa Çelebi’ye tenbîh olunmağın mâ vaka‘a bi’t-taleb ketb olundu. Fî selhi Cemâziyelâhir li sene seb‘a ve seb‘în ve elf. Şuhûdü’l-hâl: Mehmed Çavuş b. Mustafa el-Mübâşir, Cafer Beşe b. Abdullah, Mustafa b. Oruc, fahrü’l-akrân Şaban Ağa b. Süleyman Reis-i muhzırân, fahrü’l-eşbâh Mehmed Çelebi b. Abdullah Kethüdâ-yı muhzırân, Hasan Beşe Çukadâr.