Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 70 Hüküm no: 48 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali b. Ehlullah’ın Abdurrahman Ağa’ya gayr-i menkul satışı Mahmiye-i İstanbul’da Hoşkadem mahallesinde sâkin es-Seyyid Ali Efendi b. es-Seyyid Ehlullah meclis-i şer‘-i şerîfe ve atebe-i aliyye-i hüsrevânîde bi’l-fi‘l Dergâh-ı âli yeniçerileri ağası olan -kıdvet-i erbâbü’l-izzi ve’l-ikbâl, zübdet-i ashâbü’l-mecd ve’l-iclâl el-men‘ût bi’l-mehâmidi ve’l-mevsûf bi’l-mekârim, sâhibü’l-kitâbi’l-müstetâb- Abdurrahim Ağa b. Kasım taraf-ı şerîflerinden tasdîka vekîl olup vekâleti nehc-i şer‘î üzre sâbit olan umdetü’l-emâcid ve’l-ekârim Hüseyin Ağa b. Receb mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden Havâss-ı Aliyye kazâsına tâbi‘ Topçular nâm karyede vâki‘ bir tarafı Topçular Vakfı ve bir tarafı mîrî tarla ve bir tarafı Sultan Bayezid Vakfı ve bir tarafı tarîk-i âm ile mahdûd dâhiliye üç bâb fevkānî oda ve üç bâb tahtânî oda ve anbar ve kapı üzerinde iki bâb fevkānî oda ve bir matbah ve bi’r-i mâ ve güvercinlik ve hâriciyesi üç bâb fevkānî oda ve bir orta sofası ve dehlîz ve altında ahır ve havlu ve muttasıl zât-ı eşcâr-ı müsmire ve gayr-ı müsmire bahçe ve bi’r-i mâ ve sundurma ve samanlık ve muttasıl on ocaklı hâne ve bir nalbant dükkânı ve dolap kapısını müştemil mülk menzilimi bi cümleti’t-tevâbi‘ ve’l-levâhık müvekkil-i müşârun-ileyh Abdurrahman Ağa’ya bin üç yüz kıt‘a esedî guruşa bey‘-i bâtt-ı sahîh-i şer‘î ile bey‘ ve teslîm onlar dahi iştirâ ve kabûl ve kabz eylediklerinden sonra semeni olan meblağ-ı mezbûr bin üç yüz esedî guruşu yedinden bi’t-tamâm ve’l-kemâl ahz u kabz eyledim min ba‘d menzil-i mahdûd-ı mezkûrda alâka ve medhalim yoktur müşârun-ileyhin mülk-i müşterâsı olmuşdur dedikde gıbbe’t-tasdîk kayd şud. Fî 1 min şehri Ramazâni’l-mübârek sene [10]81. Şuhûdü’l-hâl: Es-Seyyid Mehmed Efendi b. es-Seyyid bi hallâk, Mehmed Beşe b. Abdurrahim, Eyüb Çelebi b. Mehmed, Hüseyin Beşe b. Abdullah.