Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 321 Hüküm no: 363 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in boşandığı kocası Ahmed Çelebi b. Hasan’dan mehir ve nafakasını tahsil ettiği Mahmiye-i İstanbul’da Sarı Nasuh mahallesinde sâkine Fâtıma bt. Ahmed nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân el-Hâc Yusuf b. Abdullah ve Hasan Çelebi b. Mustafa nâm kimesneler şehâdetleriyle şer‘an vekâleti sâbite olan ceddesi Sâliha bt. Mehmed nâm hâtun meclis-i şer‘-i şerîf-i Ahmed[î] ve mahfil-i dîn-i münîf-i Muhammedî’de müvekkile-i mezbûrenin zevci bâ‘isü’l-kitâb Ahmed Çelebi b. Hasan nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma’yı merkūm Ahmed Çelebi târih-i kitâb günü talâk-ı bâyin ile tatlîk edip zimmetinde mütekarrir ve ma‘kūdun-aleyh olan on bin akçe mehr-i müeccelini ve nafaka-i iddet-i ma‘lûmesi ve me’ûnet-i süknâsı için ta‘yîn olunan bin akçe ki cem‘an on bir bin akçemi vekâleti hasebiyle mezbûr Ahmed Çelebi yedinden tamâmen ahz u kabz eyledikden sonra zevciyyete ve gayra müte‘allika âmme-i de‘âvîden her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde mukırre-i mezbûrenin vech-i mübeyyen üzre kelimâtını el-mukarru lehü’l-merkūm Ahmed Çelebi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelâhir li sene seb‘a ve seb‘în ve elf. Şuhûdü’l-hâl: Mehmed Çelebi b. Ali, Şükrullah Bey b. Mustafa, Abdi Çelebi b. Hüseyin, İbrahim Çelebi b. Mehmed, Hasan Çelebi b. ( ) Baba Resul ve gayruhüm mine’l-huzzâr.