Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 322 Hüküm no: 364 Orijinal metin no: [49b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. İsmail’in, Mustafa b. Muharrem’den muhâlaa yoluyla boşandığı Mahmiye-i İstanbul’da Kethüdâ Hâtun mahallesinde sâkine Emine bt. İsmail nâm hâtun meclis-i şer‘-i hatîr-i lâzımü’t-tevkīrde zevci Mustafa b. Muharrem nâm kimesne li ebeveyn kız karındaşı ve tarafından husûs-ı âti’l-beyânı tasdîka vekîl olduğunu mahmiye-i mezbûrede Hâcce Hâtun mahallesi sükkânından Seyyid Ali Çelebi b. Ahmed ve Dâye Hâtun mahallesinde sâkin Mehmed b. Ramazan nâm kimesne şehâdetleri ile şer‘an vekâleti sâbit olan Mehmed nâm kimesne mahzarında bi tav‘ihâ ikrâr ve takrîr-i kelâm edip zevcim müvekkil-i merkūm Mustafa zimmetinde [50a] mütekarrir ve ma‘kūdun-aleyh olan iki akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre vekîl-i merkūm Mehmed ile muhâla‘a-i sahîha-i şer‘iyye ile muhâla‘a edip ol dahi vekâleten hul‘-ı mezbûru kabûl ettikden sonra zevciyyete müte‘allika de‘âvâdan ben müvekkil-i mezbûrun zimmetini vekîl-i mezbûr dahi bi’l-vekâle benim zimmetimi ibrâ ve iskāt eyledi dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî gurreti Recebi’l-ferd li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Mustafa Çelebi b. el-Hâc Ahmed, İbrahim Çelebi b. Ahmed, Resul b. Rıdvan ve gayruhüm mine’l-hâzırîn.