|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 79 Hüküm no: 65 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kiremitçi Ahmed Çelebi Vakfı’ndan vakıf evlâdına gelir tahsisi
Havâss-ı Aliyye kazâsı tevâbi‘inde kasaba-i Hasköy’de âsûde merhûm Kiremitçi Ahmed Çelebi nâm sâhibü’l-hayrın evlâdından olan Neslihan bt. Mustafa nâm hâtunun sadrî kebîr oğlu ve tarafından her husûsuna vekîl-i şer‘î-i müsecceli olan Mustafa Çelebi b. Ebû Bekir mahfil-i kazâda merhûm-ı mezbûr evkāfına bâ-berât-ı şehriyârî mütevellî olan sâhibü’l-kitâb Mehmed Çavuş b. Abdullah mahzarında bi’l-vekâle ikrâr ve takrîr-i kelâm edip vâlidem müvekkil-i mezbûrenin cedd-i emcedi merhûm-ı mezbûr evkāfının mesârif-i mu‘ayyeneden ihrâcât-ı lâzımeden fazlasını evlâd-ı evlâdına şart ve ta‘yîn ve vakfiye-i ma‘mûlün-bihâsında tahsîs ve tahrîr ettirmeğin zikr olunan fazla ile’l-ân vâlidem müvekkile-i mezbûreye âid olmağla mütevellî-i mezbûr bin seksen bir şehr-i Ramazân’ı gurresinden seksen bir Şevvâli gurresine gelince bir senede evkāf-ı mezbûre müsakkafâtı icârâtından ve sâir bâd-ı hevâdan ahz eylediği meblağ-ı ma‘lûmü’l-mikdârın muhâsebesini hâkim-i muvakki‘-i sadr-ı kitâb hazretleri huzûrunda görüp ba‘de küllî hesâb icârâtdan makbûzu olan yirmi iki bin iki yüz akçeden vâlidem müvekkile-i mezbûre Neslihan’a âid bin üç yüz dört akçe fazlayı ve evkāf-ı mezbûreden Yahudi hâneleri ferâğ için makbûzu olan iki bin akçeden bin sekiz yüz akçesini vâlidem mezbûre Neslihan için mütevellî-i mezbûr yedinden bi’t-tamâm bi’l-vekâle alıp kabz eyledim deyicek gıbbe’t-tasdîk kayd şud. Fî 11 min Ramazân sene 1081.
Şuhûdü’l-hâl: Mehmed Efendi b. Mehmed, Kâtib-i vakıf, Abdülbâkī Çelebi, Salih Efendi, Abdurrahman Çelebi.
|