|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 80 Hüküm no: 67 Orijinal metin no: [14b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Emine Hatun’un üvey oğlu Mehmed Efendi’ye ev satışı
Husûs-ı âti’l-beyânı mahallinde ketb ve tahrîri için bi’t-taleb mahkeme-i şerîfeden -umdetü’l-müderrisîn- Mevlânâ Mustafa Efendi irsâl olunup ol dahi zeyl-i kitâbda muharrerü’l-esâmî müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî- de Zühre Hâtun mahallesinde sâkine fahrü’l-muhadderât Emine Hâtun bt. Mustafa Bey menziline varıp akd-i meclis-i şer‘ olundukda mezbûre Emine Hâtun meclis-i ma‘kūd-ı mezkûrda üvey oğlu işbu sâhibü’l-kitâbi’l-müstetâb es-Seyyid Mehmed Efendi b. es-Seyyid Ahmed mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden mahalle-i mezbûrede vâki‘ bir tarafı Karabaş Efendi Zâviyesi ve bir tarafı bostan ve bir tarafı Keresteci İbrahim Çelebi mülkü ve bir tarafı tarîk-i âm ile mahdûd üç bâb fevkānî ve bir bâb tahtânî odaları ve altında bir bâb attâr dükkânı ve nerdibanî ve tahtânî odaları ve bi’r-i mâ ve havlu ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr es-Seyyid Mehmed Efendi’ye on dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra semeni olan meblağ-ı mezbûr on dört bin akçeyi yedinden bi’t-tamâm ahz u kabz eyledim dedikde gıbbe’t-tasdîki’ş-şer‘î yine mezbûre Emine meclis-i ma‘kūd-ı mezkûrda mârrü’z-zikr meblağı mezbûr on dört bin akçeyi üvey oğlum mezbûr es-Seyyid Mehmed Efendi’ye hibe-i sahîha-i şer‘iyye ile hibe ve teslîm ve temlîk edip ol dahi meclis-i ma‘kūd-ı mezkûrda ittihâb [ve] tesellüm ve kabz ve kabûl eyledikden sonra min ba‘d menzil-i mahdûd-ı mezkûrda alâka ve medhalim yoktur mezbûr es-Seyyid Mehmed Efendi’nin mülk-i müşterâsı ve menzil-i mezbûr mülk-i mevhûbu olmuşdur Keyfe mâ yeşâ’ ve yahtâr mutasarrıf olsun dedikde mevlânâ-yı mezbûr mahallinde tahrîr ba‘dehû meclis-i şer‘a gelip vukū‘u üzre inhâ ve takrîr etmeğin mâ vaka‘a kayd şud. Fî 16 min Ramazân sene 1081.
Şuhûdü’l-hâl: Es-Seyyid Mehmed Efendi b. es-Seyyid Abdurrahman, Umdetü’l-müderrisîn Mustafa Efendi b. Abdülehad Efendi, el-Hâc Mehmed Efendi, Mustafa Çelebi b. Hüdâverdi, es-Seyyid Ebû Bekir Çelebi b. es-Seyyid Mehmed, Ahmed b. Mehmed, Hacı Mustafa [b.] Cafer el-Müezzin, Hacı İbrahim, Ahmed Dede b. Muharrem, Abdullah b. Mehmed, Ali Beşe b. Abdullah, İbrahim Çelebi b. ( ).
|