|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 81 Hüküm no: 68 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İsa Dede vakfından bir evin kiraya verilmesi
Davud Ağa mahallesi sâkinlerinden Hasan Çelebi b. Hüseyin nâm râh-ı âbî meclis-i şer‘de işbu bâ‘isü’l-vesîka İsa Dede Vakfı’na mütevellî olan Abdullah Halîfe b. Mustafa mahzarında ikrâr ve takrîr-i kelâm edip emlâkimden mahalle-i mezbûrede vâki‘ bir tarafı Fâtıma bt. Hasan mülkü ve bir tarafı el-Hâc Mehmed b. Abdullah mülkü ve bir tarafı yine benim âhar mülküm ve taraf-ı râbi‘i tarîk-i âm ile mahdûd mülk bahçeyi cemî‘ tevâbi‘ ve levâhıkı ile mâl-ı vakf-ı mezbûrdan olmak üzre mütevellî-i mezbûr Abdullah Halîfe’ye iki bin beş yüz fıddî nakd-i râyic fi’l-vakt akçeye bi tarîki’l-istiğlâl bey‘ edip ol dahi tarîk-i merkūm üzre mâl-ı vakf-ı mezbûr ile iştirâ ve kabûl edip ba‘de’t-tahliye târih-i kitâb şehri gurresinden üç sene tamâmına değin her senede üçer yüz yetmiş beşer akçeden bin yüz yirmi beş akçe icâre ile bana îcâr ve teslîm ben dahi istîcâr ve tesellüm eyledim dedikde gıbbe’t-tasdîki’l-mu‘teber mahalle-i mezbûre sükkânından diğer Hasan Çelebi nâm kazzâzdır ki menzil-i merkūma ve ücret-i mersûmeye emr-i kabûlü hâvî kefâlet-i sahîha ile kefîl ve zâmin olıcak kayd şud. Fî 16 min Ramazân Sene 1081.
Şuhûdü’l-hâl: Ahmed Odabaşı, Receb Odabaşı, Salih Efendi, Ali el-muhzır
|