|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 82 Hüküm no: 69 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Emîr Mehmed b. Osman’ın aleyhine açılan miras davasının reddi
Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de ergen odalarında sâkin iken fevt olan Emir Mehmed b. Ömer’in li eb ve üm kız karındaş[ları] Ümmügülsün ve Müslime nâm hâtunlar mahfil-i kazâda işbu sâhibü’l-kitâb Mustafa Beşe b. Dursun mahzarında her biri ikrâr ve takrîr-i kelâm edip mûrisimiz müteveffâ-yı mezbûr Mehmed’in merkūm Mustafa Beşe zimmetinde min ciheti’l-karzi’ş-şer‘î yedi yüz elli akçe hakkı olup kable’l-ahz fevt olmağla meblağ-ı mezbûr irsen bize isâbet etmeğin meblağ-ı mezbûru hâlâ taleb eylediğimizde teslîmde ta‘allül eder suâl olunup alıverilmek matlûbumuz[dur] dediklerinde gıbbe’s-suâl ve akībe’l-inkâr müdde‘iyetân-ı mezbûretândan müdde‘âlarını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müteveffâ-yı mezbûr Emir Mehmed zimmetinde cihet-i mezbûreden ve gayriden reddi vâcib yedi yüz elli akçe deyni olmadığına mezbûr Mustafa Beşe’ye yemîn teklîf olundukda ol dahi alâ vefki’l-mes’ûl half billâhi te‘âlâ etmeğin merkūmetân Ümmügülsüm ve Müslime ile’l-ân …? bî-vech ta‘arruzdan men‘ birle kayd şud. Fî 20 min şehri Ramazâni’l-mübârek sene 1081.
Şuhûdü’l-hâl: Hasan b. Abdullah, Dilaver b. Abdullah, Ali b. Abdullah, Hasan b. Hüseyin.
|