|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 82 Hüküm no: 70 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasan Yazıcı’nın muhallefâtından zevcesine mehr-i müeccel ödendiği
Ebâ Eyyûb el-Ensârî -radiye anhü’l-Bârî-de el-Hâc Hüsrev mahallesinde sâkin iken bundan akdem vefât eden Hasan Yazıcı’nın verâseti zevce-i metrûkesi Emine bt. Şaban nâm hâtundan gayri zâhirde vâris-i ma‘rûfu olmamağın medîne-i mezbûrede vâki‘ beytülmâl-i âmme ve hâssa-i hazret-i müşârun-ileyh evkāfına hâsıl kayd olunmağla müteveffâ-yı mezbûrun muhallefâtının rub‘u zevcesine irsen isâbet edip sülüs-i erbâ‘ı cânib-i vakfa âid olmağın mezbûre Emine hazret-i müşârun-ileyh evkāfına bi’l-fi‘l mütevellî olan fahrü’l-akrân Ali Ağa mahzarında bi tav‘ihâ ikrâr ve takrîr-i kelâm edip zevcim mûrisim müteveffâ-yı mezbûr zimmetinde mütekarrir ve ma‘kūdun aleyh iki bin akçe mehr-i müeccelimin üç yüz akçesini mezbûra hayâtında hibe etmişdim bin yedi yüz akçe bâkī mehr ile ber mûceb-i defter-i kassâm rub‘ hisseyi mütevellî-i mûmâ-ileyhden taleb eylediğimde mehr-i mezkûrumun ol mikdâr idiğini inkâr etmekle beynimize muslihûn tavassut edip el-hâletü hâzihî vesâtat-ı muslihûn ile mehr-i mezkûrum ve rub‘ hissem mukābelesinde mütevellî-i mûmâ-ileyh ile bi tarîki’t-teharüc’ş-şer‘î bin yedi yüz fıddî râyic fi’l-vakt akçe üzerlerine sulh olup bedel-i sulhu tamâmen mütevellî-i mûmâ-ileyh yedinden alıp kabz edip mehr-i mezbûrum ve rub‘ hisseme müte‘allika âmme-i de‘âvîden mütevellî-i mezbûrun zimmetini ibrâ eyledim dedikde gıbbe’t-tasdîk kayd şud. Fî 20 min Ramazân sene 1081.
Şuhûdü’l-hâl: Ali Efendi b. Hızır, Mustafa Çelebi b. el-İmâm, Mustafa Çelebi b. Hüsrev Hayme-dûz, Hasan Bey b. Yusuf.
|