.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 83
Hüküm no: 71
Orijinal metin no: [15b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kurfa köyünden Yani v. İstemad’ın Yorgi v. Kosta’ya bahçeli ev satışı

Hazret-i Ebâ Eyyûb el-Ensârî a‘mâlinden Kurfa nâm karye sâkinlerinden Yani v. İstemad nâm zimmî meclis-i şer‘de Yorgi v. Kosta nâm zimmî mahzarında ikrâr ve takrîr-i kelâm edip bey‘-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Manolaki mülkü ve bir tarafı Papaz Angeli mülkü ve bir tarafı Hıristo mülkü ve bir tarafı tarîk-i âm ile mahdûd üç bâb tahtânî odaları ve eşcâr-ı müsmire ve gayr-ı müsmire bahçeyi müştemil mülk menzilimi mezbûr Yorgi’ye on üç bin fıddî nakid akçeye râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra semeni olan mezbûrü’n-na‘t on üç bin akçeyi mezbûr Yorgi yedinden bi’t-tamâm ve’l-kemâl ahz u kabz edip min ba‘d menzil-i mahdûd-ı mezkûrda benim alâka ve medhalim yoktur mezbûr Yorgi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîk kayd şud. Fî 20 min Ramazân sene 1081.


Şuhûdü’l-hâl: Abdullah b. Mustafa, Ömer Bey b. Seydî, Hasan b. Abdullah, Mehmed Beşe [b.] Süleyman, Şaban b. Mehmed Beşe, Yani v. Totri, İstemad v. Apostol v. Kosta, Simo v. Persersekoli, Nikola Aleksi, Landriyo v. Yorgi.