|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 87 Hüküm no: 78 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasköylü Hanefi Beşe b. Davud’un Emine bt. Abdullah’a ev satışı
Kasaba-i Hasköy’de Turşucuzâde Hüseyin Çelebi mahallesinde sâkin Hanefi Beşe b. Davud meclis-i şer‘de işbu râfi‘ü’l-kitâb Emine bt. Abdullah nâm hâtun muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden mahalle-i mezbûrede vâki‘ bir tarafı Dilaver Bey mülkü ve bir tarafı Anbarcı Mehmed Çelebi mülkü ve tarafeyni tarîk-i âm ile mahdûd iki bâb tahtânî oda ve sundurma ve zât-ı eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘ [ve] levâhıkıyla mezbûre Emine Hâtun’a sekiz bin fıddî râyic fi’l-vakt akçe ile adedi nâ-ma‘lûm bir kabza fülûsa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra semeni olan meblağ-ı mezbûr sekiz bin akçeyi yedinden bi’t-tamâm ve’l-kemâl ahz u kabz edip ba‘de’l-yevm menzil-i mahdûd-ı mezkûrda aslâ benim alâka ve medhalim yoktur mezbûre Emine Hâtun’un mülk-i müşterâsı olmuşdur dedikde gıbbe’t-tasdîk kayd şud. Fî 24 min şehri Ramazân sene 1081.
Şuhûdü’l-hâl: Ali Çelebi b. Hüseyin, Mustafa Çelebi b. Nasuh, Aydın Çelebi b. Mehmed, Şaban Çelebi b. Hüseyin, Ömer Halîfe b. Mehmed, Receb Halîfe b. Mustafa, Mustafa Çelebi b. Ömer Efendi, Hüseyin Çelebi b. ( ), Mehmed Çelebi, Hacı Yusuf.
|