.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 88
Hüküm no: 79
Orijinal metin no: [17a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Dimitri v. Yorgi’nin Anifiye bt. Dimitri’ye peşin parayla ev satışı

Havâss-ı Aliyye kazâsına tâbi‘ Avasya nâm karye ahâlîsinden Dimitri v. Yorgi nâm zimmî meclis-i şer‘de Anifi[ye] bt. Dimitri nâm nasrâniye tarafından tasdîka vekîli olup vekâleti nehc-i şer‘î üzre sâbite olan babası mezbûr Dimitri muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Yani Koçi mülkü ve iki tarafı Kaçivela bahçesi ve bir tarafı tarîk-i âm ile mahdûd iki bâb fevkānî oda ve altında ahır ve bir mikdâr bahçeyi ve bi’r-i mâ ve havluyu müştemil mülk menzilimi cemî‘ tevâbi‘ ve levâhıkıyla müvekkile-i mezbûre Anifiye’ye yüz altı kıt‘a esedî guruş ile bir rub‘ guruşa bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve kabûl eyledikden sonra semeni olan meblağ-ı mezbûr yüz altı esedî guruş ile bir rub‘u yedinden tamâmen ahz u kabz eyledim min ba‘d menzil-i mahdûd-ı mezkûrda alâka ve medhalim yoktur müvekkile-i mezbûre Anifiye’nin mülk-i müşterâsı olmuşdur keyfe mâ teşâ’ mutasarrıfa olsun dedikde gıbbe’t-tasdîk mâ vaka‘a ketb olundu. Fî 24 min Ramazân sene 1081.


Şuhûdü’l-hâl: Mehmed Çelebi, Abdullah Çelebi, Nasuh, Ahmed Çelebi [b.] Eyüb, Hüseyin [b.] Ali, Ali [b.] Abdullah, Mehmed b. Mahmud, Hasan b. Abdullah, Zafiri v. Aleksi, Foti v. Dimo, Zafiri v. Yani, Dimitri v. İstendil, Nikola.