|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 89 Hüküm no: 80 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Asım Ahmed Çelebi vakfından Anifiye bt. Dimitri’ye ev alışı
Havâss-ı Aliyye kazâsına tâbi‘ Avasya nâm karyede sâkine Anifiye bt. Dimitri nâm nasrâniye tarafından husûs-ı âti’l-beyâna vekîl olup vekâleti Serpine v. Diyani ve Aleksandra v. Panayot nâm zimmîler şehâdetleriyle şer‘an sâbite olan babası mezbûr Dimitri meclis-i şer‘de merhûm Asam Ahmed Çelebi Vakfı’na hâlâ mütevellî olan râfi‘ü’s-sak el-Hâc Eyüb Çelebi mahzarında bi’l-vekâle ikrâr ve i‘tirâf edip silk-i mülk-i sahîhimde münselik emlâkimden mahalle-i mezbûrede vâki‘ bir tarafı Yani Fohi mülkü ve iki tarafı Yani Kaçivela bahçesi ve bir tarafı tarîk-i âm ile mahdûd iki bâb fevkānî oda ve ahırı ve bahçe ve havluyu ve bi’r-i mâ’ı müştemil mülk menzilimi mütevellî-i mezbûr el-Hâc Eyüb Çelebi’ye yüz altı guruş ile bir rub‘ guruşa bi tarîki’l-istiğlâl bey‘ ve teslîm ol dahi tarîk-i merkūm üzre iştirâ ve kabûl ve kabz-ı semen-i ma‘dûd ve teslîm-i mebî‘-i mahdûd kıldığından sonra yed-i mütevellî-i mezbûr, menzil-i mezkûru ba‘de’t-tahliye târih-i kitâbdan bir sene tamâmına değin on altı esedî guruşa müvekkile-i mezbûreye îcâr ve teslîm ol dahi istîcâr ve tesellüm ve kabûl ve kabz eyledikden sonra menzil-i mezbûrun derkine ve ücret-i merkūmeye işbu hâzır bi’l-meclis babası mezbûr Dimitri emir ve kabûlü hâvî kefâlet-i sahîha-i şer‘iyye ile kefîl ve zâmin oldum dedikde gıbbe’t-tasdîk kayd şud. Fî 24 min Ramazân sene 1081.
Şuhûdü’l-hâl: Sâbikūn
|