|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 93 Hüküm no: 88 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Mustafa’nın yeğeninin eşi Aişe Hanım’a arsa hibesi
Havâss-ı Aliye kazâsı a‘mâlinden kasaba-i Hasköy mahallâtından Turşucuzâde Hüseyin Çelebi mahallesinde sâkin fahrü’l-akrân Mehmed Ağa b. Mustafa tarafından hibe-i âti’l-beyânı ikrâra vekîl olup Ali Efendi b. el-Hâc Mehmed ve Ömer Efendi b. Ramazan nâm kimesneler şehâdetleriyle şer‘an vekâleti sâbite olan hemşirezâdesi olan İbrahim Çelebi b. Mehmed nâm vekîl meclis-i şer‘de müvekkil-i mezbûrun zevce-i menkûhası râfi‘atü’l-vesîka Ayşe Hâtun bt. Ali muvâcehesinde bi’l-vekâle ikrâr ve i‘tirâf edip silk-i mülk-i sahîhimde münselik emlâkimden mahalle-i mezbûrede vâki‘ iki tarafı yine müvekkil-i mezbûrun âhar mülkü ve bir tarafı Mehmed Çelebi mülkü ve bir tarafı tarîk-i hâs ile mahdûd hibe-i âtiyetü’z-zikrin sudûruna değin müvekkilim mezbûrun iki sokak kapısı beyninde vâki‘ tarîkin üst tarafında, sed üzerinde tûlen on yedi, arzan altı buçuk, bi hesâb-ı satrancî yüz on buçuk zirâ‘ mülk arsasını eşcâr-ı müsmire ve gayr-ı müsmire ve sâir tevâbi‘ ve levâhıkı ile fâriğan ani’ş-şevâgil zevcesi mezbûre Ayşe Hâtun’a hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve tesellüm ve kabûl ve kabz eyledi min ba‘d zikr olunan arsa-i hâliye mezbûre Ayşe Hâtun’un mülk-i mevhûbudur deyû dedikde gıbbe’t-tasdîk kayd şud. Fî 5 [Şevvâl] sene [10]81.
Şuhûdü’l-hâl: Sâbikūn
|