|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 94 Hüküm no: 89 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasköy yahudilerinden Musi’nin arpa ve saman teklifinden muâf olduğu
Havâss-ı Aliyye Kazâsı a‘mâlinden kasaba-i Hasköy’de sâkin ehl-i sûk Yahudilerinden Karakaş v. Mayer ve Yasef v. Savi ve Hayım ve sâirleri meclis-i şer‘de yine kasaba-i mezbûrede vâki‘ gümüşhâneci olan râfi‘ü’l-vesîka Musi v. Avraham nâm Yahudiyi ihzâr ve mahzarında her biri üzerine da‘vâ edip işbu sene-i mübârekede Silivri menziline imdâd için taraf-ı saltanattan irsâl olunan bârgirlerin zâd u zevâdları için kazâ-i mezbûrda tahsîli fermân olunan arpa ve saman bizim hissemize isâbet eden arpa ve saman bahâsından merkūm Musi’ye dört yüz akçe tahmîl edip taleb eylediğimizde edâda ta‘allül eder suâl olunup alıverilmesi murâdımızdır dediklerinde gıbbe’s-suâl merkūm Musi cevâbında benim san‘atım darbhâneye müte‘allik olup ekseriyâ taraf-ı mîrîden gelen toprağı bilâ ücret kal‘ edip ve ondan mâ‘adâ kadîmü’l-eyyâmdan bu âna gelince bu makûle nesne bize teklîf olunmamıştır deyicek isre’l-istintâk merkūmûn Yahudilerden merkūm Musi’nin san‘atı darbhâneye müte‘allik olup taraf-ı mîrîden gelen toprağı bilâ ücret kal‘ edip ve kadîmü’l-eyyâmdan gümüşhâne erbâbına bu makûle nesne teklîf olunmadığını bi tav‘ihim ikrâr ve i‘tirâf eylediklerinde alâ mûcebi ikrârihim kadîme muhâlif merkūm Musi’den meblağ-ı mezbûru mütâlebeden men‘ birle. Fî 5 min Şevvâl sene 81.
Şuhûdü’l-hâl: Eyüb Çelebi b. Mehmed, Abdurrahman Çelebi b. İbrahim, Mustafa Çelebi b. İsmail, Mehmed b. Mahmud, Mehmed b. Eyüb, Hasan Abdullah.
|