.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 97
Hüküm no: 95
Orijinal metin no: [19b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasköy’den Aişe ve Fâtıma adlı iki yetimin nafakası ve vasîlerinin muhasebesi

Havâss-ı Aliyye kazâsı tevâbi‘inden kasaba-i Hasköy mahallâtından Ahmed Çelebi mahallesinde sâkin iken bundan akdem vefât eden Hasan Beşe nâm râcilin verâseti sulbî sagīre kızları Ayşe ve Fâtıma nâm yetîmeler ile li ebeveyn ammisi Aydın Beşe nâm râcile münhasıra olup ba‘dehû mezbûre Ayşe dahi fevt olup verâseti vâlidesi Nefise bt. Abdullah ile li ebeveyn kız karındaşı mezbûre Fâtıma’ya ve ammisi merkūm Aydın Beşe’ye münhasıra olduğu şer‘an zâhir ve müte‘ayyin oldukdan sonra merkūm Aydın Beşe tarafından husûs-ı âti’l-beyâna vekîl olup vekâleti yedinde olan hüccet-i şer‘iyye mûcebince şer‘an sâbite olan Nasuh Reis b. Yusuf mahfil-i kazâda müteveffâ-yı mezbûr Hasan Beşe’nin hâl-i hayâtında kızları sagīretân-ı mezbûretân üzerlerine vasiyy-i muhtâr nasb ve ihtiyâr eylediği sâhibü’l-kitâb Mustafa Çelebi b. Dilaver mahzarında üzerine takrîr-i da‘vâ edip bundan esbâk sene selâsin ve seb‘în ve elf târihinden bu âna gelince mezbûr Mustafa Çelebi sagīretân-ı mezbûretâna babaları müteveffâ-yı mezbûrdan bi’l-irsi’ş-şer‘î isâbet ve intikāl eden emvâli i‘mâl ve murâbahasını ahz ve kasaba-i mezbûrede vâki‘ lede’l-ahâlî ma‘lûmü’l-hudûd menzili ikrâ ve kirâsını kabz ve dört sene mezbûretâna ve mezbûr Ayşe fevt oldukdan sonra dört sene dahi yalnız sagīre-i mezbûre yedinde olan nafaka hücceti üzre nafakalarını edâ ve menzil-i mezbûru ta‘mîr ve termîm edip muhâsebesin görmüşümdür, el-hâletü hâzihî sekiz senede vasiyy-i mezbûrun muhâsebesi yedinde olan fermân-ı şerîf nâtık olduğu üzre görülmek müvekkil-i mezbûrun matlûbudur deyicek vasiyy-i mezbûrun sinîn-i mezbûrede olan ahz u i‘tâsı hâkim-i muvakki‘-i sadr-ı kitâb huzûrunda hesâb ve kitâb olundukda mezbûre Fâtıma’ya babası müteveffâ-yı mezbûrdan irsen intikāl eden on iki bin yüz yetmiş beş akçe ve hemşîresi müteveffât-ı mezbûre Ayşe’den isâbet eden beş bin üç yüz otuz altı akçe ki cem‘an on yedi bin beş yüz on bir akçesi ile’l-ân mevcûd ve meblağ-ı mezbûrun elli altı esedî ve bir rub‘ı gāib ani’l-meclis Hammâmî Ahmed Beşe zimmetinde ve mâ‘adâ vasiyy-i merkūm[ca] mazbût olup meblağ-ı mezbûrun sekiz senede murâbahasından on altı bin yedi yüz kırk akçe ve menzil-i mezbûrun kirâsından dahi on üç bin sekiz yüz yedi akçe ki cem‘an otuz bin beş yüz kırk yedi akçe vasiyy-i mezbûrun alâ vechi ikrârihî makbûzu olup târih-i mezbûrdan dört sene üç ay tamâmına değin sagīretân-ı mezbûretânın her birine yevmî sekizer akçeden beher yevm on altışar akçe hesâbı üzre yirmi dört bin dört yüz seksen akçe nafakalarını ve dört sene dahi yalnız mezbûre Fâtıma’nın nafaka-i mefrûzasına yevmî sekiz akçe hesâbı üzre on bir bin sekiz yüz yirmi akçe ber mûceb-i hüccet-i şer‘iyye edâ ve teslîm ve menzil-i mezbûrun dahi sekiz senede ta‘mîr ve termîmine iki bin dört yüz seksen beş akçe ki cem’an otuz sekiz bin dört yüz seksen beş akçe vasiyy-i mezbûrun harc ve sarfı olup lâkin vasiyy-i mezbûrun yedi bin dokuz yüz otuz sekiz akçe fazlası zuhûr edip meblağ-ı mezbûr sagīre-i mezbûrenin emvâl-i mevrûsesi murâbahasından matlûbumdur deyû cevâb vericek vekîl-i mezbûr i‘âde-i kelâm edip vasiyy-i merkūm sinîn-i mezbûrede ol mikdâr nafaka teslîm eylediği mukarrer ve menzil-i mezbûrun ta‘mîr ve termîmine harc ve sarf eylediği meblağ-ı mezbûr kadr-i ma‘rûf idiği muhakkaktır lâkin vasiyy-i mezbûrun meblağ-ı merkūm onu on bir akçeden ziyâdeye i‘mâl ve menzil-i mezbûrun kirâsından ikrârı üzre makbûzu olan on üç bin sekiz yüz yedi akçeden ziyâde kabz eylemişdir deyicek isre’l-istintâk ve akībe’l-inkâr vekîl-i mezbûrun beyândan âciz ve husûs-ı mezbûrede vasiyy-i merkūm ayniyle musaddık olmağın sagīre-i mezbûrenin zikr olunan onu on birisine ziyâde i‘mâl eylemediğine ve menzil-i mezbûrun kirâsından sinîn-i mezbûrede on üç bin sekiz yüz yedi akçeden ziyâde ahz u kabz eylemediğine vasiyy-i mezbûr Mustafa Çelebi’ye gıbbe’l-istintâk ol dahi alâ vefki’l-mes’ûl yemîn billâhi te‘âlâ etmeğin mâ-cerâ bi’t-taleb ketb olundu. Fî 10 Şevvâl sene [10]81.


Şuhûdü’l-hâl: Hüseyin Çelebi b. Ali, Mehmed b. es-Seyyid ( ), Mehmed b. Mahmud, Hasan b. Hüseyin, Hasan b. Hüsnü, Mustafa Efendi Kâtib.