.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 102
Hüküm no: 103
Orijinal metin no: [21a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Litros reâyâsından Panayot ve oğlu Aleksandra’nın cizyelerini ödemeleri

Havâss-ı aliyye kazâsı tevâbi‘inden Litros nâm karye zimmîlerinden işbu ashâbü’l-vesîka Dimitri v. Yani ve Yorgo v. Nikola ve Dimitri v. Mihal ve Dragi v. Dergo nâm zimmîler ve sâirleri meclis-i şerî‘at-i şerîfede yine karye-i mezbûre zimmîlerinden Panayot v. Nikola nâm zimmî muvâcehesinde her biri ikrâr ve takrîr-i kelâm edip merkūm Panayot ve ile’l-ân kâr u kisbi ve harc u sarfı bir yerde olan sulbî kebîr oğlu gāib ani’l-meclis Aleksandra karye-i mezbûrenin cizye defterinde isimleri mastûr ve mukayyed re‘âyâdan olmağla işbu sene-i mübârekede her birimizin üzerine edâsı lâzım gelen cizye için her nefer üzerine onar guruş isâbet etmekle merkūm Panayot’tan kendi cizyesi ve oğlu merkūm cizyesi için onar guruşdan yirmi guruşu taleb eylediğimizde edâda ta‘allül eder suâl olunup alıverilmek matlûbumuzdur dediklerinde gıbbe’s-suâl mezbûr merkūm Panayot kendi ve oğlu merkūm Aleksandra karye-i merkūme re‘âyâsından olup bir nefer için bu sene onar guruş cizye isâbet eylediğini tav‘an ikrâr ve oğlu merkūm kendi iyâlinden olup müstahakk-ı edâ-yı cizye idiğini i‘tirâf etmeğin alâ mûcebi i‘tirâfihî yirmi guruşu edâya merkūm Panayot’a tenbîh birle mâ cerâ bi’t-taleb ketb olundu. Fî 12 min Şevvâl sene [10]81.


Şuhûdü’l-hâl: Mehmed el-Hâc, Mustafa Çelebi b. İsmail, Eyüb Çelebi b. Mehmed, Mehmed b. Mahmud, Mehmed b. Eyüb, Ali b. Abdullah ve gayruhüm mine’l-hâzırîn.