.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 103
Hüküm no: 104
Orijinal metin no: [21a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Panayot v. Mavridi adlı bir Rum yetimine yeni bir vasî tayini

Fi’l-asl vilâyet-i Rumeli’nde Mizistre kazâsına tâbi‘ Longanide nâm karye zimmîlerinden olup bundan akdem mahmiye-i İstanbul’da bakkallık işlerken mürd olan Aleksi v. Panayot nâm zimmînin verâseti li ebeveyn karındaşı oğlu Panayot v. Mavridi nâm zimmîye münhasıra idiği şer‘an zâhir ve müte‘ayyin oldukdan sonra sagīr-i mezbûrun üvey babası olup tesviye-i umûru için kıbel-i şer‘den kadîmden mansûb vasîsi olan Tanaşo v. Nikite nâm zimmî mahfil-i kazâda sâbıkan sagīr-i mezbûr üzerine kıbel-i şer‘den mansûb vasîsi olan râfi‘ü’r-rakīm Todori v. Dimo nâm zimmî muvâcehesinde ikrâr ve takrîr-i kelâm edip ile’l-ân vasîsi olduğum üvey oğlum sagīr-i mezbûra ammisi hâlik-i mezbûrdan bi’l-irsi’ş-şer‘î isâbet ve intikāl eden on üç bin nakd-i fıddî râyic fi’l-vakt akçeyi sâbıkan vasî olan mezbûr Todori bi’l-vesâye alıp kabz etmişdi. El-hâletü hâzihî merkūm Todori vesâyet-i mezbûreden kendi rızâ ve ihtiyârıyla fâriğ olup kasr-ı yed etmekle sagīr-i mezbûr üzerine min kıbel-i şer‘den vasî nasb olunduğum ecilden zikr olunan on üç bin akçeyi vasiyy-i sâbık merkūm Todori yedinden bi’l-vesâye alıp kabz eyledim meblağ-ı mezbûrdan zimmetinde bir akçe ve bir habbe bâkī kalmadı dedi dedikde gıbbe’t-tasdîk kayd şud. Fî 13 min Şevvâli’l-mükerrem sene 1081.


Şuhûdü’l-hâl: Ahmed Çelebi b. Mehmed, Süleyman Bey b. Ali, Mehmed b. Mahmud, Hüseyin b. Ali, Dilaver, Panayot v. Nikola, Panayot v. Yamya, İstirati v. Izgrafer, İstemad v. Mavridi, Dimitri v. Yorgi, Nikola v. Todori.