|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 104 Hüküm no: 105 Orijinal metin no: [21a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kirkor v. Mahat adlı bir Ermeni’nin yetimi Andon’un vesayeti
Mahrûse-i Galata a‘mâlinden kasaba-i Kasımpaşa’da Kertehorye demekle ma‘rûf mahallede sâkin olup bundan akdem vilâyet-i Boğdan’da mütemekkin iken mürd olan Kirkor v. Mahat nâm Ermeni’nin verâseti zevcesi Moğal bt. Mircan nâm Ermeni’ye ile sulbî oğlu sagīr oğlu Andon nâm yetîme münhasıra idiği şer‘an zâhir ve müte‘ayyin oldukdan sonra sagīr-i merkūmun vâlidesi olup ammisi ve vasîsi üzerine kıbel-i şer‘den mansûb nâzırı olan mezbûre Moğal meclis-i şer‘-i hatîr-i lâzımü’t-tevkīrde sagīr-i merkūmun li ebeveyn ammisi ve kıbel-i şer‘den mansûb vasîsi olan Artin v. Mahat nâm Ermeni muvâcehesinde üzerine takrîr-i da‘vâ edip merkūm Artin’i oğlum sagīr-i mezbûra babası hâlik-i merkūmdan irsen isâbet ve intikāl eden iki yüz elli kıt‘a esedî guruşa kıbel-i şer‘den mansûb vasî olmağla alıp kabz eylemişdi. El-hâletü hâzihî vasiyy-i merkūm Artin diyâr-ı âhara gitmek üzre azîmet etmekle zikr-i sâbık iki yüz elli guruşu yerli yerinden bana göstermek üzre kıbel-i şer‘den vasiyy-i merkūm Artin’e tenbîh olunmak matlûbumdur deyicek gıbbe’s-suâl vasiyy-i merkūm Artin cevâbında birâderzâdem sagīr-i merkūm Andon’a babası hâlik-i mezbûrdan isâbet eden iki yüz elli kıt‘a esedî guruşu vesâyetim hasebiyle alıp kabz eyledim zikr olunan iki yüz elli guruş ile’l-ân zimmetimdedir deyû bi tav‘ihî ikrâr ve i‘tirâf etmeğin kayd şud. Fî 13 min Şevvâl sene [10]81.
Şuhûdü’l-hâl: Hasan b. Ali Serbölük, Mehmed b. Eyüb, Eyüb Çelebi el-müsta‘id, Ebû Bekir b. Abdullah, Ali b. Abdullah.
|