|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 105 Hüküm no: 107 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Terkos köylerinden Podime halkının Fâtih vakfı ormanlardan izinsiz ağaç kesip kömür yapmalarının men‘i
Cennet-mekân Firdevs-âşiyân merhûm ve mağfûrun-leh Ebü’l-feth ve’l-megâzi Sultan Mehmed Han Gāzi Evkāfı mütevellîsi kıbelinden Havâss-ı Aliyye kazâsı a‘mâlinden Terkos nâhiyesine tâbi‘ Podime nâm karyenin zâbiti fahrü’l-emâsil ve’l-akrân Eyüb Ağa yediyle taraf-ı Saltanat-ı aliyyeden husûs-ı âti’z-zikri hakk-ı adl üzre mahallinde istimâ‘ ve fasl için bu fakîre hitâben emr-i şerîf-i âlîşân vârid olmağın imtisâlen lehû cânib-i şer‘den Mevlânâ Mustafa Efendi b. İsmail irsâl olunup ol dahi zeyl-i kitâbda muharrerü’l-esâmî müslimîn ile sâlifü’z-zikr Podime’ye varıp mahall-i münâzi‘un fîhde akd-i meclis-i şer‘-i şerîf eylediğinde zâbit-i mûmâ-ileyh Eyüb Ağa meclis-i ma‘kūd-ı mezkûrda kömürcü tâifesinden Kiryaki v. Dimitri ve Karaca v. Ustoyan ve Aleksandra v. Yani ve Ustoyan v. İslani ve Todori v. Dimitri ve Yani v. Todori ve diğer Yani v. Dimitri ve Dimitri v. Arabacı ve Aleksi v. Dimitri ve Kostantin v. Yorgi ve Kosta v. Yani ve Todori v. İstati ve Aleksi v. Todori muvâcehelerinde üzerlerine da‘vâ ve takrîr-i kelâm edip işbu koru evkāf-ı mezbûreden olup ben zabt ve rabtına me’mûr iken merkūm[ûn]dan Kiryaki ve Karaca ve Aleksandra ve Ustoyan ve diğer Yani ve Dimitri ve Aleksi ve Kostantin ve Kosta ve Todori ve Aleksi benim izn ve icâzetim yoğ iken işbu korunun ağaçlarını kat‘ ve kömür yakıp intifâ‘ etmeleriyle bi’d-defâ‘at nehy ve men‘ eylediğimde memnû‘ olmamak ecilden husûs-ı mezbûru hâlâ Şeyhülislâm hazretlerinden bir vakfın toprağında hüdâyî nâbit olan eşcârı ba‘zı kimesneler kat‘ etmek istediklerinde mütevellî olan kimesneleri men‘e kādir olur mu? deyû istiftâ olundukda olur deyû buyrulmağın ve ondan mâ‘adâ bir vakfın toprağında hüdâyî nâbit olan eşcârı ba‘zı kimesneler fuzûlen dibinden kat‘ edip, kömür yakıp istihlâk eyleseler mütevellî ol eşcârın kâ’imen kıymetlerini ol kimesnelere tazmîne kādir olur mu? deyû istiftâ eylediğimde cevâb-ı bâ-savâblarında olur deyû buyrulmağın merkūmûn zimmîlerden suâl olunup ber mûceb-i emr-i şerîf-i âlî-şâna ve fetevâ-yı şerîf, zikr-i sâlif vakıf korudan merkūmûnun eşcâr kat‘ etmemeleri için cânib-i şer‘-i kavîmden tenbîh olunmak matlûbumdur deyicek gıbbe’s-suâl merkūmûn cevâblarında zikr olunan koru vakf-ı mezbûrdan olup bilâ izn eşcâr kat‘ ve kömür yakdıklarını her biri tav‘an ikrâr ve i‘tirâf eylediklerinde ber mûceb-i fetvâ-yı şerîf min ba‘d zikr olunan korudan bilâ izin eşcâr kat‘ etmemek üzre merkūmûn zimmîlere tenbîh olunup vâki‘ hâli mevlânâ-yı mezbûr mahallinde tahrîr ve ba‘dehû meclis-i şer‘a gelip inhâ ve takrîr etmeğin kayd şud. Fî 18 min Ramazân [10]81.
Şuhûdü’l-hâl: Fahrü’l-akrân Receb Beşe, Kaytas Bey b. Abdullah, İbrahim Beşe b. Abdullah, Ali b. Abdullah, Mustafa Beşe.
|