|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 106 Hüküm no: 108 Orijinal metin no: [21b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Elizo v. Haron ile Hıristo v. Yani’ye ait olup emanette iken ölen beygirin tazmin edilmesi
İşbu râfi‘ü’r-rakīm Elizo v. Haron nâm zimmî ve şerîki Hıristo v. Yani nâm Ermeni meclis-i şer‘-i şerîfde Yehûda v. Abraham nâm Yahudi muvâcehesinde üzerine da‘vâ ve takrîr-i kelâm edip mezbûr Yahudi târih-i kitâbdan on ay mukaddem bir [re’]s siyah bârgirimizi Kağıthâne’ye gitmek için bundan istikrâ etmekle Yahudi sâlifü’z-zikr bârgiri koşup hendeğe düşürmekle ta‘addîsinden nâşî mârrü’z-zikr bârgir yedinde helâk olmağın kıymet-i şer‘iyyesini merkūm Yahudi’den mukaddemâ taleb eylediğimizde ta‘addîsini inkâr etmeğin beynimizde münâza‘ât-ı kesîre vukū‘undan sonra vesâtat-ı muslihîn ile mesfûr Yehûda ile da‘vâ-yı mezbûrdan bizi dokuz yüz fıddî râyic akçeye inşâ-i akd-i sulh edip biz dahi sulh-ı mezbûru kabûl ve bedel-i sulh olan mârrü’z-zikr dokuz yüz akçeyi ile’l-ân taleb eylediğimizde edâdan imtinâ‘ eder suâl olunup alıverilmesi murâdımızdır dediklerinde gıbbe’s-suâl mezbûr Yahudi? cevâbında fi’l-vâki‘ târih-i kitâbdan on ay mukaddem ben zikr olunan bârgiri müdde‘iyân-ı mezbûrândan Kağıthâne’ye gitmek için kirâ ile alıp altı günden sonra yedimde helâk oldu deyû ikrâr ve lâkin muslihûn tavassutuyla olan dokuz yüz akçe-i sulhu inkâr etmeğin müdde‘iyân-ı mezbûrândan müdde‘âsını mübeyyine beyyine taleb olundukda Balatkapısı dâhilinde Mustafa Paşa mahallesi sükkânından Vasil v. Trandafilo ve Güla v. Mihal nâm Ermeniler meclis-i şer‘a hâzırân olup isre’l-istişhâd fi’l-vâki‘ târih-i kitâbdan on ay mukaddem mezbûr Yahudi müdde‘iyân-ı merkūmân ile zikr olunan müstehlek bârgir da‘vâsından bizim huzûrumuzda dokuz yüz akçe üzerine sulh etmeğin onlar dahi sulh-ı mezbûru kabûl eylediler biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın bedel-i sulh-ı mezbûr dokuz yüz akçeyi müdde‘iyân-ı merkūmâna edâ ve teslîme mezbûr Yahudi’ye tenbîh birle kayd şud. Fî 11 min Şevvâl sene [10]81.
Şuhûdü’l-hâl: Hüseyin Çelebi b. Ali, Mehmed Çelebi b. Mahmud, Mehmed [b.] Eyüb, Hasan b. Hüseyin.
|