.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 107
Hüküm no: 109
Orijinal metin no: [22a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kiremitçi Süleyman Çelebi vakfına ait bir dükkânın borçla takası

Havâss-ı Aliyye kazâsı a‘mâlinden Litros nâm karye sâkinlerinden Yorgo v. Angelo nâm zimmî meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb el-Ensârî -subbet aleyhi sicâlü rahmeti Rabbihi’l-Bârî-de Kiremitçi Süleyman Çelebi Evkāfı’na bi’l-fi‘l mütevellî olan sâhibü’l-kitâb Mehmed Çavuş b. Abdüddâim mahzarında ikrâr ve takrîr-i kelâm edip silk-i mülk-i sahîhimde münselik emlâkimden karye-i mezbûrede vâki‘ bir tarafı Bostânî Hasan Bey mülkü ve etrâf-ı selâsesi tarîk-i âm ile mahdûd iki bâb tahtânî oda ve bir sagīr hâne ve üzerine iki bâb oda ve bir bakkal dükkânını müştemil mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile bundan akdem evkāf-ı mezbûre mütevellîsine semen-i ma‘lûme mukābelesinde alâ tarîki’l-istiğlâl bey‘ ve teslîm ve tefvîz edip ol dahi mâl-ı vakf-ı mezbûr ile iştirâ ve ba‘de’t-tahliye ücret-i mu‘ayyene-i ma‘lûme ile müddet-i ma‘lûm tamâmına değin bana îcâr ben dahi istîcâr ve kabûl edip ile’l-ân mâl-ı vakf-ı mezbûrun asıl ve ücret-i menzil-i mezkûrda zimmetimde iki yüz otuz sekiz kıt‘a esedî guruş cem‘ olup edâsına menzil-i mahdûd-ı mezkûrdan gayri ism-i mâl ıtlâk olunur bir nesnem olmamağla menzil-i mahdûd-ı mezkûru mütevellî-i mezbûr Mehmed Çavuş’a üç yüz elli kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vakf-ı mezbûr için tevliyyeti hasebiyle iştirâ ve tesellüm ve kabz ve kabûl edip semeni olan mezbûrü’n-na‘t üç yüz elli guruşun iki yüz otuz sekiz guruşunu zikr olunan Kiremitçi Süleyman Çelebi Evkāfı’na bâlâda zikr olunan üzre deynim olan iki yüz otuz guruşa takās edip ol dahi mukāssa ve kabûl eylediğinden sonra bâkī yüz on iki guruşun doksan guruşunu Davud Paşa Evkāfı’na zimmetimde lâzımü’l-edâ deynim olan yedişer dirhem gelir yüz guruşa edâ ve mütevellîsine teslîme mütevellî-i mezbûr Mehmed Çavuş’u tarafımdan tevkîl ve bâkī yirmi iki kıt‘a esedî guruşa mâl ve vakf-ı mezbûrdan olmak üzre mütevellî-i merkūm Mehmed Çavuş yedinden alıp kabz edip zimmetinde mârrü’z-zikr üç yüz elli guruşdan bir akçe ve bir habbe hakkım kalmadı. Min ba‘d menzil-i mahdûd-ı mezkûr vakf-ı mezkûrun mülk-i mahz-ı müşterâsı ve hakk-ı sırf-ı sarîhidir keyfe yeşâ’ mütevellîsi mutasarrıf olsun dedikde kayd şud. Fî 14 min Şevvâl sene [10]81.


Şuhûdü’l-hâl: Berberzâde Mustafa Efendi el-kadı, İsmail Efendi b. Ahmed, Mehmed b. Ferhad, Seyyid Mehmed b. Mahmud, Ahmed b. Mehmed, Eyüb Çelebi b. Süleyman. Derkenâr: Bey‘-i mezkûr Zilka‘de’nin yirminci günü ikâle olunup hücceti on beş kâğıt aşağı tahrîr olunmuşdur bu hüccet ile amel olunmamak için bu mahalle şerh verilmişdir. Fî 20 min Zilka‘de sene [10]81.