|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 111 Hüküm no: 115 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed’in muhallefât bedelinin vârisi babasına teslimi
Mahmiye-i İstanbul’da Koca Mustafa Paşa semtinde Hâcce Hâtun mahallesinde sâkin Ahmed Bey b. Mahmud meclis-i şer‘de bundan esbâk Mısr-ı Kahire’de vâli iken intikāl-i dâr-ı bekā eden Karakaş Ali Paşa merhûmun dâmâdı ve vilâyet-i mezbûrede beytülmâl emîni olmağla muhallefât-ı câi’z-zikre vâzı‘ü’l-yedi olan şerefü’l-akrân Mustafa Ağa b. Cem tarafından ikrâr-ı âti’z-zikri tasdîka vekîl olup nehc-i mu‘ayyen üzre şer‘an vekâleti sâbite olan hâmilü’l-kitâb Receb Efendi b. Yusuf mahzarında ikrâr ve takrîr-i kelâm edip mukaddemâ vilâyet-i mezkûrede ticâret üzre mütemekkin iken bi emrillâh fevt olan sulbî kebîr oğlum Mehmed’in hîn-i vefâtında yanına varıp ma‘rûf ve ma‘rûfesi olmamağla mecmû‘ muhallefâtına emîn-i mûmâ-ileyh Mustafa Ağa vaz‘-ı yed etmeğin hâlâ oğlum müteveffâ-yı mezbûrun muhallefâtını emîn-i mûmâ-ileyh Mustafa Ağa’dan taleb eylediğimde on sekiz bin üç yüz seksen aded para bana def‘ ve teslîm ben dahi alıp kabz edip ve yüz elli guruş dahi fîmâ ba‘d edâ etmek üzre yedime mümzâ ve mahtûm temessük vermeğin ben dahi kabûl eylemiş idim min ba‘d mârrü’z-zikr on sekiz bin üç yüz seksen paradan emîn-i mûmâ-ileyh [Mustafa Ağa yedinden ahz u kabz eyledim] dedikde gıbbe’t-tasdîk mâ vaka‘a kayd şud. Fî 16 min Şevvâl sene [10]81.
Şuhûdü’l-hâl: …? Mustafa b. Ali, Davud Efendi el-İmâm, Piyâle b. Abdullah, Mehmed Beşe b. İbrahim, Mehmed Çelebi b. Abdülaziz, Mehmed b. Mahmud.
|