.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 111
Hüküm no: 116
Orijinal metin no: [23b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şeyhler köyündeki tarla ve çayırların mûris Şirzat Hanım’a teslimi

Mahmiye-i İstanbul’da Kâtib Muslihiddin mahallesi sâkinelerinden işbu sâhibetü’l-kitâb Şirzat Hâtun tarafından husûs-ı âti’l-beyâna vekîl olup vekâleti mezbûrenin zâtını ma‘rifet-i şer‘iyye ile ârifân olan Süleyman Çelebi b. Hasan ve Mehmed ve Mehmed ( ) Hasan şehâdetleriyle şer‘an sâbite olan fahrü’l-eimme Mehmed Efendi b. Süleyman nâm vekîl meclis-i şerî‘at-ı şerîfede zikri câ’î tarlalara vâzı‘ü’l-yedi idiği ikrâr ile sâbit olan Derviş Beşe b. Ömer mahzarında bi’l-vekâle üzerine da‘vâ ve takrîr-i kelâm edip Havâss-ı aliyye kazâsına tâbi‘ Terkos nâhiyesi a‘mâlinden Şeyhler nâm karyede vâki‘ lede’l-ahâlî ve’l-cîrân ma‘lûmü’l-hudûd çiftliğin mâliki ve çiftlik-i mezbûra teba‘iyyet ile zabt ve tasarruf olunup merhûm ve mağfûrun-leh es-Sultan Bayezid Hân-ı Velî Evkāfı arâzisinden olan tarlalar ve çayırların mutasarrıfı iken bundan akdem vefât eden Ahmed Çelebi müvekkilem mezbûre Şirzat Hâtun’un zevci olmağla verâseti zevcesi mezbûre ile sulbî oğlu Mehmed’e münhasıra olup ba‘dehû mezbûr Mehmed dahi fevt olmağın verâseti vâlidesi müvekkilem mezbûre Şirzat Hâtun’a münhasıra olmağın çiftlik-i mezbûr bi’l-irsi’ş-şer‘î müvekkilem mezbûre ile oğlu mezbûr Mehmed’e ve ol tarlalar ve çayırlar intikāl-i âdî ile mezbûr Mehmed’e intikāl edip merkūm Mehmed dahi vefât etmekle çiftlik-i mezbûr irsen vâlidesi müvekkilem mezbûre Şirzat’a intikāl ve çiftlik-i mezbûra teba‘iyyet [ile] zirâ‘at olunan sâlifü’z-zikr tarlalar ve çayırların hakk-ı matlûbesi müvekkilem mezbûrenin olmağla müvekkilem mezbûre ol tarlalar ve çayırları tapu-yı misli ile almağa tâlibe iken evkāf-ı mezbûre mütevellîsi altmış guruş resm-i tapu ile ecânibden merkūm Derviş Beşe’ye vermeğin işbu târih-i kitâb senesi Cumâdelâhiresi gurresinde ben yine mezbûre Şirzat tarafından vekâletle mârrü’z-zikr tarlalar ve çayırları evkāf-ı mezbûr mütevellîsi tarafından husûs-ı mezbûra me’mûr olan Ahmed Çelebi b. Mehmed indinde mahalle-i mezbûrda hilâfete müvellâ olan Mevlânâ İbrahim Efendi b. Receb huzûrunda da‘vâ eylediğimizde mezbûr Derviş Beşe kaziyye bâlâda olan tafsîl üzre idiğini ikrâr etmeğin Mevlânâ-yı mûmâ-ileyh mârrü’z-zikr tarlalar ve çayırların resm-i tapusu olmak üzre verdiği altmış guruşu müvekkilem mezbûreden alıp ol tarlalar ve çayırlardan kasr-ı yed ve müvekkilem mezbûre Şirzat[’a] teslîme tenbîh ve yedime hüccet-i şer‘iyye vermiş iken hâlâ mezbûr Derviş ta‘allülden hâlî olmamağla müvekkilem merkūme gavsü’l-enâm şeyhu Meşâyihi’l-İslâm -sellemehü’s-selâm- hazretlerinden Zeyd fevt olup vâlidesi Hind’i terk ettikte Zeyd’in müstahakk-ı tapu olan tarlalarını Hind tapu-yı misli ile almağa tâlibe iken sâhib-i arz Hind’e vermeyip âhara vermeğe kādir olur mu? deyû istiftâ eylediğinde cevâb-ı bâ-savâblarında olmaz deyû buyrulmağın müvekkilem mezbûre husûs-ı mezbûru mahrûse-i Edirne’de dergâh-ı mu‘allâma arzuhâl eylediğinde ber mûceb-i fetvâ-yı şerîfe ve hüccet-i şer‘iyye ol tarlalar ve çayırları bî-garaz müslümanlar takdîr eylediklerinde resm-i tapu ile müvekkilem mezbûr Şirzat’a alıverip merkūm Derviş Beşe’den ve âhara ta‘allül ve nizâ‘ olunup ihkāk-ı hak olunmak bi’l-vekâle matlûbumdur deyû târih-i mezbûr ile müverrah mevlânâ-yı müşârun-ileyh imzâsıyla mümzâ ve hâtemiyle mahtûm hüccet-i şer‘iyye ibrâz ve takrîrine muvâfık ve müdde‘âsını nâtık fetvâ-yı şerîfe ve emr-i şerîf-i âlîşân ibrâz etmeğin her biri feth ve kırâet ve merkūme Derviş Beşe’den suâl olundukda merkūm Derviş Beşe mazmûn-ı hüccet-i mezbûru bi tav‘ihî ikrâr ve i‘tirâf etmeğin alâ mûcebi ikrârihî hükm-i sâbık üzre mârrü’z-zikr tarlalar ve çayırlardan merkūm Derviş Beşe’nin kasr-ı yedine tenbîh birle mâ vaka‘a bi’t-taleb ketb olundu. Fî 16 min Şevvâl sene [10]81.


Şuhûdü’l-hâl: Hasan Beşe b. Yusuf el-Mübâşir, Ömer Bey b. Habib, Halil Beşe b. Abdullah, Abdülkādir b. Yusuf, Mehmed b. Ömer, Mehmed Çelebi b. Hüseyin, Hüseyin b. Hasan ve gayruhüm.