.:: İstanbul Kadı Sicilleri ::.


Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671)
cilt: 29, sayfa: 113
Hüküm no: 117
Orijinal metin no: [23b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahmud b. Abdülcelil’in Receb Bey’den aldığı tazminat mukabili sulh oldukları

Vilâyet-i Anadolu’da Aksaray şehrinde Kaymarisye? mahallesinde sâkin Mahmud b. Abdülcelil nâm kimesne meclis-i şer‘de işbu sâhibü’l-kitâb Receb Bey b. İsa mahzarında ikrâr ve takrîr-i kelâm edip târih-i kitâbdan bir sene mukaddem merkūm Receb Bey benim sipâhim ve zâbitim değil iken bi gayri hakkın beni şehr-i mezbûrda ahz ve fuzûlen habs edip bi gayri vech benden on beş guruş ahz u kabz etmeğin hâlâ zikr olunan on beş guruşumu merkūm Receb Bey’den taleb ve da‘vâ eylediğimde husûs-ı merkūmu bi’l-külliye inkâr etmeğin beynimizde münâza‘ât-ı kesîre vâki‘ olmuşdu, el-hâletü hâzihî beynimizde muslihûn tavassutuyla [sulh] edip da‘vâ-yı mezkûrumdan beni merkūm Receb Bey ile beş yüz akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan mezbûrü’n-na‘t beş yüz akçeyi mezbûr Receb Bey yedinden alıp kabz edip husûs-ı mezbûra müte‘allik cemî‘ de‘âvîden merkūm Receb Bey’in zimmetini ibrâ eylediğimde mukırr-ı mezbûru kelimât-ı muharreresiyle mezbûr Receb vicâhen tasdîk ve şifâhen tahkīk etmeğin mâ vaka‘a kayd şud. Fî 16 min Şevvâl sene [10]81.


Şuhûdü’l-hâl: Mehmed Çavuş b. Ali el-Mübâşir, Hüseyin b. Abdülcelil, Ahmed Beşe Çukadâr ve gayruhüm mine’l-hâzırîn