|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 113 Hüküm no: 118 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Attar Hüseyin Vakfı’na ait evin Raziye Hatun’dan istirdadı
Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de Sofular mahallesinde sâkin işbu sâhibü’l-kitâb Yusuf b. Abdullah meclis-i şer‘de Râziye bt. Mustafa nâm hâtun mahzarında üzerine takrîr-i da‘vâ edip mezbûre Râziye bundan akdem mahalle-i merkūmede vâki‘ bir tarafı Ebû Bekir mülkü ve bir tarafı Saraylı Hâtun mülkü ve bir tarafı Mustafa b. Bayram tasarrufunda olan vakıf menzil ve bir tarafı tarîk-i hâs ile mahdûd bir bâb tahtânî oda ve cüneyneyi müştemil menzili bana mülkü olmak üzre dört bin fıddî râyic fi’l-vakt akçe[ye] bey‘ ve teslîm ben dahi iştirâ ve tesellüm edip semeni olan meblağ-ı mezbûrun iki bin akçesini yedimden alıp kabz edip mâ‘adâsını dahi teslîm üzre iken menzil-i mahdûd-ı mezkûr merkūm Attâr Hüseyin nâm sâhibü’l-hayr vakfından icâre-i müeccele ile ve beher şehr onar akçe ücret-i müeccele ile merkūme Râziye’nin taht-ı icâresinde idiğine hâlâ vakıf olup menzil-i vakf-ı mezbûru merkūme Râziye’ye red ve teslîm eylediğim iki bin [akçeyi] mezbûreden taleb eylediğimde teslîmden imtinâ‘ eder suâl olunup alıverilmek matlûbumdur deyicek gıbbe’s-suâl mezbûre Râziye Hâtun cevâbında fi’l-hakīka menzil-i mahdûd-ı mezbûr merhûm-ı mezkûr evkāfından icâre-i mu‘accele ve beher şehr onar akçe ücret ile kendinin taht-ı tasarrufunda iken müdde‘î-i merkūm Yusuf mülkiyyet üzre yedi bin akçeye bey‘ ve teslîm ve semeni olan meblağ-ı mezbûrdan iki bin akçesini merkūm Yusuf yedinden alıp kabz eylediğini bi tav‘ihâ ikrâr etmeğin alâ mûcibi ikrârihâ menzil-i mezbûru kabz ve mukaddemâ makbûzu olan iki bin akçeyi merkūm Yusuf’a def‘ ve teslîme mezbûre Râziye’ye tenbîh birle mâ cerâ kayd şud. Fî 16 min Şevvâl sene [10]81.
Şuhûdü’l-hâl: Himmet Beşe b. Mehmed, Hüseyin Ağa Kethüdâ, Mehmed Çelebi b. Mahmud, Hasan b. Abdullah, Dilaver b. Abdullah ve gayruhüm mine’l-hâzırîn.
|