|
Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 118 Hüküm no: 126 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Çatalca’dan Hıristo v. Dori’nin yeğeni Seryano’ya bahçeli ev satışı
Havâss-ı Refî‘a kazâsı tevâbi‘inden Çatalca nâhiyesine tâbi‘ Oklağı nâm karye zimmîlerinden Hıristo Dori v. İstemad zimmî meclis-i şer‘de karındaşı oğlu Seryano v. Anastaş nâm zimmî muvâcehesinde ikrâr [ve] takrîr-i kelâm edip akd-i âti’z-zikrin sudûruna değin emlâkimden karye-i mezbûrede vâki‘ bir tarafı benim âhar mülküm ve bir tarafı Yerakine mülkü ve bir tarafı Anastaş mülkü ve bir tarafı tarîk-i âm ile mahdûd bir bâb fevkānî oda ve tahtında ahırı ve mezbûre Yerakine mülküne varınca arsa-i hâliyemi müştemil karındaşım olup mukaddemâ mürd olan ( ) zimmîden bi’l-irsi’ş-şer‘î bana isâbet eden mülk-i mevrûs menzilimi ve yine menzil-i mezbûr kurbunda bir tarafı Anastaş mülkü ve bir tarafı İsteryo mülkü ve bir tarafı Todor Kosta mülkü ve bir tarafı Anastaş mülkü olan tokad ile mahdûd, tokadda benim mülk-i mevrûsum olan nısf hissemi bi cümleti’t-tevâbi‘ ve’l-levâhık karındaşım oğlu merkūm Seryano’ya beş bin beş yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eylediğimde ol dahi ber minvâl-i muharrer iştirâ ve kabûl edip semeni olan mezbûrü’n-na‘t beş bin beş yüz akçeyi karındaşım oğlu merkūm Seryano yedinden tamâmen alıp kabz edip menzil-i mahdûd-ı mezkûr ve nısf tokadda alâkam kalmadı karındaşım oğlu mezbûr Seryano’nun mülk-i müşterâsıdır Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ cerâ kayd şud. Fi 20 min Şevvâl sene [10]81.
Şuhûdü’l-hâl: Mustafa Çelebi Bâçdar, Ebû Bekir Beşe b. Abdullah, Dilaver Bey [b.] Abdullah, Ali b. Abdullah Dimo v. Yani ve Dimitri v. Yorgo, Andriye v. İstodulo, Todor v. Yorgi, Yani v. İsteryano, Yorgaki v. Dimitri ve gay[ruhüm].
|