Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 119 Hüküm no: 128 Orijinal metin no: [25b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah b. Yusuf’un Mehmed Çelebi’ye nafakadan doğan borcunu mülk karşılığı tediyesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Serv[i] mahallesinde sâkin Abdullah b. Yusuf meclis-i şer‘de kayınatası râfi‘ü’l-kitâb Mehmed Çelebi b. Mustafa mahzarında ikrâr ve takrîr-i kelâm târih-i kitâbdan beş sene mukaddem ben bi hasebi’l-iktizâ diyâr-ı âhara gidip mezbûr Mehmed Çelebi’nin sulbiye kızı zevcem Ayşe’nin ve mezbûre Ayşe benim firâşımdan hâsıl ettiği Râbia’nın nafaka ve kisvesine bir nesne irsâl etmek mümkün olmamağla kayınatam mezbûr Mehmed Çelebi cânib-i şer‘den benim üzerime her birine yevmî beşer akçeden cem‘an on akçe nafaka farz ve takdîr ve inde’z-zarûre istidâne ve lede’z-zafer rücû‘a izin ve yedine hüccet-i şer‘iyye alıp mezbûrları bu âna gelince bi şarti’r-rücû‘ istidâne ile infâk ve iksâ etmeğin hâlâ geldiğimde sinîn-i merkūmede müctemi‘a olan on sekiz bin akçe nafaka-i mefrûzayı benden kayınatam mezbûr Mehmed Çelebi taleb ve da‘vâ eylediğinde edâya bir hâl ile iktidârım olmamağın silk-i mülk-i sahîhimde münselik emlâkimden mahalle-i mezbûrede vâki‘ bir tarafı benim âhar bağım ve yine bir tarafı hemşîrem Safiye Hâtun mülkü ve bir tarafı Mustafa mülkü ve bir tarafı ba‘zan Bostancı İbrahim’in vakıf menzili ve ba‘zan Mehmed Bey mülkü ve ba‘zan Arpacı İbrahim Beşe ve ba‘zan Kapıcı Mustafa ve ba‘zan sükkerî mülkleri ve bir tarafı Musli Bey mülkü ve bir tarafı sed ve ba‘zan baca ile mahdûd, eşcâr-ı müsmire ve gayr-ı müsmireyi hâvî tahmînen bir buçuk dönüm bir kıt‘a bağı meblağ-ı mezbûre mukābelesinde kayınatam mezbûr Mehmed Çelebi’ye tarafeynden îcâb ve kabûlü hâvî bey‘-i sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm edip nafaka-i mefrûza-i mezkûreye müte‘allik âmme-i de‘âvîden zimmetimi ibrâ ve iskāt eyledi min ba‘d zikr olunan bağ-ı mahdûd-ı mezkûr kayınatam mezbûr Mehmed Çelebi’nin mülk-i müşterâsı ve hakk-ı mahzıdır, Keyfe mâ yeşâ’ mutasarrıf olsun dedikde mukırr-ı mezbûru kelimât-ı meşrûhasında merkūm Mehmed Çelebi vicâhen tasdîk ve mârrü’z-zikr bağı meblağ-ı merkūm mukābelesinde iştirâ ve kabûl ve dâmâd-ı mezbûrun zimmetini husûs-ı mezbûra müte‘allika âmme-i de‘âvîden ibrâ ve iskāt eylediğini şifâhen tahkīk etmeğin mâ vaka‘a bi’t-taleb ketb olundu. Fî 21 min Şevvâli’l-mükerrem sene [10]81. Şuhûdü’l-hâl: Halil Efendi b. Haydar el-İmâm, Halil Çelebi b. Murtaza, Mehmed Çelebi b. Hasan el-Müezzin, Mustafa b. Abdi, Abdi Beşe b. Yusuf, Hasan b. Yusuf ve gayruhüm.