Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 120 Hüküm no: 129 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in Ali Ağa’da bulunan alacağının Ali Ağa tarafından ikrarı Bin yetmiş beş senesinde vâli-i livâ-i Kıbrıs olan Abdülkādir Paşa’nın dîvân efendisi iken fevt olan Ahmed Efendi’nin verâseti li ebeveyn birâderi es-Seyyid Mehmed Bey b. es-Seyyid Mustafa ile vilâyet-i Anadolu’da livâ-i Karahisar’a tâbi‘ Sandıklı kasabasında Hisar mahallesinde sâkine vâlidesi Ayşe bt. Receb nâm hâtuna münhasıra idiği şer‘an zâhir ve müte‘ayyin oldukdan sonra mezbûr es-Seyyid Mehmed Bey kendi tarafından asâleten ve vâlidesi mezbûre Ayşe tarafından husûs-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan cebehânede mütemekkin Hasan Odabaşı b. Mustafa ve Mehmed Beşe b. Veli şehâdetleri ile şer‘an vekâleti sâbite olmağın vekâleti mahfil-i kazâda medîne-i Hazret-i Ebâ Eyyûb el-Ensârî -radiye anhu Rabbuhü’l-Bârî-de Koca Kasımpaşa mahallesi sükkânından iftihârü’l-emâcid ve’l-ekârim Kaftancı Ali Ağa b. Ahmed Efendi tasdîka vekîl olan el-Hâc Hasan b. Ali mahzarında bi’l-asâle ve bi’l-vekâle ikrâr ve takrîr-i kelâm edip birâderim merhûm-ı mezbûrun müvekkil-i mûmâ-ileyh Ali Ağa zimmetinde min ciheti’l-karz yüz elli kıt‘a esedî guruş hakkı olup mukābelesinde müvekkil-i mûmâ-ileyh Ali Ağa yedinden bir sîm gaddâre irtihân ve kabz edip meblağ-ı mezbûru kable’l-ahz birâderim merhûm olmağla irsen bana ve vâlidesine intikāl etmeğin meblağ-ı mezbûru müvekkil-i mûmâ-ileyh Ali Ağa’dan bi’l-asâle ve bi’l-vekâle taleb eylediğimde meblağ-ı mezbûr mukābelesinde rehine vaz‘ eylediğim gaddâreyi bana teslîm edin ben dahi meblağ-ı mezbûru teslîm edeyim deyû mârrü’z-zikr sîm gaddâre müstehlek ve kıymeti için bin altı yüz akçedir deyû cevâb verdiğimde beynimizde münâza‘ât-ı kesîre vâki‘ olmuşdu, el-hâletü hâzihî vesâtat-ı muslihûn ile müvekkil-i mûmâ-ileyh Ali Ağa’yı doksan esedî guruş üzerine inşâ-i akd-i sulh eylediğinde ben dahi sulh-ı mezbûru kabûl ve bedel-i sulh olan mârrü’z-zikr doksan guruşu mezbûr Ali Ağa yedinden alıp kabz edip mâ‘adâ da‘vâsından zimmetimi bi’l-asâle ve bi’l-vekâle ibrâ eyledim deyicek mezbûr el-Hâc Hasan meclis-i mezbûrda müvekkilim mûmâ-ileyh Ali Ağa dahi mârrü’z-zikr gaddâre da‘vâsından mezbûr es-Seyyid Mehmed Bey’in deynini ibrâ eyledim dedi deyicek gıbbe’t-tasdîki’ş-şer‘î mâ cerâ kayd şud. Fî 21 min Şevvâl [10]81. Şuhûdü’l-hâl: Umdetü erbâbü’t-tahrîr İmâmzade Mehmed Efendi, (…)zâde Mustafa Çelebi, Mustafa b. Mehmed, Mehmed b. Mahmud, Ahmed Çelebi Çukadâr, Salih Efendi b. Mehmed.