Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 121 Hüküm no: 130 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abro v. Manol’un Duka v. Todori’deki alacağını malla takas ettiği Havâss-ı aliyye kazâsına tâbi‘ Cehud Bergosu nâm karyede sâkin Abro v. Manol nâm zimmî meclis-i şer‘de işbu râfi‘ü’l-kitâb Duka v. Todori nâm zimmî muvâcehesinde takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı kız karındaşım Senadi mülkü ve bir tarafı meydan ve voyvoda çiftliği ve bir tarafı Dotoş mülkü ve bir tarafı tarîk-i âm ile mahdûd iki bâb tahtânî oda ve bir sofa ve havluyu ve havlu içinde bir bâb tahtânî odayı dahi muhtevî mülk menzilimi cemî‘ tevâbi‘ ve levâhıkı ile mezbûr Duka’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz elli kıt‘a esedî guruşa bey‘ ve teslîm ol dahi minvâl-i muharrer üzre iştirâ ve kabûl edip semeni olan mezbûrü’n-na‘t yüz elli esedîyi gāib ani’l-meclis Yusuf Beşe nâm kimesneye deynim olan yüz elli esedîye merkūm Duka emrim ile kefîl olup ba‘dehû malından edâ etmekle merkūm Duka’ya zimmetimde lâzımü’l-edâ deynim olan yüz elli esedî guruşa takās ol dahi mukāssa kabûl eyledim dedikde mâ vaka‘a kayd şud. Fî 23 Şevvâl [10]81. Şuhûdü’l-hâl: Arslan Beşe b. Abdullah, Mehmed Beşe b. Abdullah, Mehmed Bey b. ( ), Mehmed b. Mahmud, Hüseyin b. Abdullah, Dilaver el-muhzır