Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 122 Hüküm no: 131 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Pavlo’nun miras evinin verese tarafından peşin parayla satışı Mora sancağında Mizistre kazâsına tâbi‘ Longanide nâm karye ahâlîsinden olup bundan akdem hâlik olan Dimitri v. Pavlo’nun verâseti li ebeveyn karındaşları İstemad ve Yani’ye münhasıra olduğu şer‘an zâhir ve müte‘ayyin oldukdan sonra mezbûrân İstemad ve Yani meclis-i şer‘de râfi‘ü’r-rakīm Kiryazi v. Polihroni nâm zimmî muvâcehesinde her biri ikrâr ve takrîr-i kelâm edip hâlik-i mezbûrdan irsen bize intikāl eden emlâkimizden karye-i mezbûrede vâki‘ bir tarafı Receb mülkü ve bir tarafı kendimizin âhar mülkü ve bir tarafı Nikite mülkü ile mahdûd bir bâb fevkānî odayı müştemil mülk-i mevrûs menzilimizi cümle tevâbi‘ ile mezbûre Kiryazi’ye yirmi sekiz esedî guruşa bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr yirmi sekiz esedî guruşu yedinden bi’t-tamâm ahz u kabz eyledik zikr olunan menzil-i mezkûru mahallinde zabt ve tasarrufa taslît eyledik min ba‘d alâka ve medhalimiz yoktur mezbûr Kiryazi’nin mülk-i müşterâsıdır Keyfe mâ yeşâ’ mutasarrıf olsun dedikde mâ vaka‘a kayd şud. Fî 23 Şevvâl [10]81. Şuhûdü’l-hâl: Ahmed Çelebi b. Mehmed, Hüseyin b. Mehmed, Osman b. Hüseyin, Osman b. Abdullah, Totori Hıristo, Anoreş, Polihroni, Pero, Yano.