Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 122 Hüküm no: 132 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah adlı merhumun Hüseyin Beşe’deki alacak hakkının vereseye ödendiği Husûs-ı âti’z-zikrin mahallinde tahrîri iltimâs olunmağın Mevlânâ Salih Mehmed Efendi irsâl olunup ol dahi zeyl-i vesîkada muharrerü’l-esâmî müslimîn ile medîne-i Hazret-i Ebâ Eyyûb el-Ensârî’de Çavuş Kasım mahallesinde sâkin Kürt Hüseyin Beşe b. Abdullah’ın menziline varılıp beyne’l-vazî‘ ve’ş-şerîf akd-i meclis-i şer‘-i şerîf olundukda mahmiye-i İstanbul’da Ali Paşa-yı Atîk mahallesinde sâkin iken bundan akdem vefât eden Çalık Mehmed Beşe b. Abdullah’ın verâseti zevcesi İsmihân bt. Osman ile li ebeveyn ammisi oğlu Ahmed b. Abdullah’a münhasıra olduğu şer‘an zâhir oldukdan sonra mezbûr İsmihân ve merkūm Ahmed taraflarından husûs-ı âti’z-zikre vekîl olup âharı dahi tevkîle me’zûn olan Silivrili Abbas Çelebi tarafından husûs-ı âti’z-zikre vekîl olup Mehmed Bey b. Derviş ve Hüseyin Çelebi b. Hasan şehâdetleriyle şer‘an vekâleti sâbite olan Ali Paşa mahallesi İmâmı Ahmed Efendi b. Yusuf meclis-i mezbûrda işbu râfi‘ü’l-vesîka merkūm Hüseyin Beşe mahzarında bi’l-vekâle ikrâr edip merkūm Hüseyin Beşe târih-i kitâbdan yedi ay mukaddem müteveffâ-yı mezbûr Çalık Mehmed Beşe’den beher vakıyyesi otuzar akçeye olmak üzre yüz yetmiş vakıyye toprak? beş bin yüz akçe şişe iştirâ ve kabz edip kable edâi’s-semen mezbûr Çalık Mehmed Beşe fevt [olmağın] zevcesi ve ammisi oğlu meblağ-ı mezbûrun iki yüz elli akçesini vekîlleri mezbûr Abbas Çelebi yediyle ahz edip mâ‘adâ dört bin sekiz yüz altmış akçeyi dahi taleb eylediklerinde merkūm Kürt Hüseyin Beşe’nin meblağ-ı mezbûru edâya iktidârı olmamağla müteveffâ-yı mezbûrdan kabz eylediği toprağın? yüz altmış iki vakıyyesine bi hesâb-ı mezbûru dahi bi’r-rızâ merkūm Hüseyin Beşe yedinden vekâleten alıp kabz etmekle zimmetinde bir akçe ve bir habbe bâkī kalmadı dedikde gıbbe’t-tasdîk vâki‘ü’l-hâl mevlânâ-yı mezbûr tahrîr, ba‘dehû gelip ahbere alâ mâ cerâ. Fî 23 Şevvâl [10]81. Şuhûdü’l-hâl: Süleyman Bey b. Hasan, Musa Çelebi b. Mustafa, Mehmed Çelebi b. …? Osman b. Yusuf, Mehmed Bey b. Koçu.