Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 326 Hüküm no: 371 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Hafız Abdurrahman Efendi’nin evini Âlime Hatun bt. Ahmed’e istiğlâl yoluyla sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye’de Ebü’l-feth Sultan Mehmed Hân -aleyhi’r-rahmetü ve’l-gufrân- câmi‘-i şerîfi ve ma‘bed-i latîfi kurbunda Molla Kirmasti mahallesinde sâbıkan Bosna kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî Hâfız Abdurrahman Efendi b. Eyüb Efendi’nin sâkin olduğu menzile varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde mûmâ-ileyh Hâfız Abdurrahman Efendi meclis-i ma‘kūd-ı mezbûrda mahmiye-i mezbûrede Karagümrük kurbunda Tahtaminâre mahallesi sâkinelerinden fahrü’l-muhadderât Âlime Hâtun bt. Ahmed tarafından husûs-ı câ’i’l-beyâna vekîl olduğun zâtını ma‘rifet-i şer‘iyye ile ârifân zikr olunan Tahtaminâre mahallesi sâkinlerinden Hoca İsmail Efendi b. Mehmed ve Yenibahçe kurbunda Mi‘mâr Sinan mahallesi sâkinlerinde Mahmud Bey b. İbrahim nâm kimesneler şehâdetleriyle şer‘an sâbit olan umdetü kuzâti’l-İslâm zübdetü vülâti’l-enâm Mustafa Efendi b. Hacı Bekir mahzarında ikrâr ve i‘tirâf edip mahmiye-i mezbûrede Hoca Hayreddin mahallesinde vâki‘ bir tarafından merhûm Muhaşşî Şeyhzâde Efendi vakfı olan menzil ve bir tarafından Sıdkı Efendi veresesi mülkleri ve iki tarafından tarîk-i âm ile mahdûd dâhiliyye ve hâriciyyesinde büyût-ı adîdeyi müştemil mülk menzilimi vekîl-i mûmâ-ileyh Mustafa Efendi’ye bi tarîki’l-istiğlâl bin üç yüz kıt‘a esedî guruşa bey‘ ve teslîm edip ol dahi müvekkilesi mûmâ-ileyhâ Âlime Hâtun için iştirâ ve kabûl ve tesellüm eyledikden sonra semen olan bin üç yüz kıt‘a esedî guruşu vekîl-i mûmâ-ileyh yedinden tamâmen alıp kabz eylediğimden sonra menzil-i mahdûd-ı mezkûru vekîl-i mûmâ-ileyh ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan iki ay tamâmına değin yirmi kıt‘a esedî guruşa bana îcâr ve teslîm edip ben dahi istîcâr ve kabûl ve tesellüm eyledim dedikde, gıbbe’t-tasdîki’ş-şer‘î zikr olunan Hoca Hayreddin mahallesi sâkinlerinden olup terziler kethüdâsı olan İbrahim Çelebi b. Hüseyin nâm kimesne meclis-i ma‘kūd-ı mezbûrda vekîl-i mûmâ-ileyh mahzarında ücret-i mezbûreye ve derk-i menzil-i mezkûra kefîl ve zâmin oldum demeğin husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Mustafa b. Mustafa ile meclis-i şer‘-i hatîre gelip alâ vukū‘ihî inhâ ve takrîr eyledikde mâ hüve’l-vâki‘ bi’l-ibtigā ketb ve imlâ olundu. Fi’l-yevmi’r-râbi‘ min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Atâullah Efendi b. Hüsameddin, mefharü’l-müderrisîni’l-kirâm Mehmed Efendi b. Ebûbekir imâm-ı hazret-i kāimmakām Paşa, Şeyhî Mehmed Çelebi b. Ahmed Efendi, mefharü’l-kuzâti’l-İslâm Gümüşzâde Yahya Efendi Kadı-i İznikmid muvakkaten, zübdetü’l-kuzât Mustafa Efendi b. Eyüb Efendi, Musli Efendi b. Ahmed Efendi tâbi‘-i Atâullah Efendi, Hüseyin Efendi b. Mehmed el-İmâm, Hüseyin Halîfe b. Receb el-Müezzin, Muharrem Efendi b. Mehmed, el-Hâc Hüseyin Ağa b. Halil ve gayruhüm