Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 125 Hüküm no: 136 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Abdullah’ın Mezid Bey Vakfı’na bey‘ bi’l-istiğlâl usulüyle satması Medîne-i Hazret-i Ebâ Eyyûb el-Ensârî’de Otakçıbaşı mahallesinde sâkin İbrahim Beşe b. Ali meclis-i şer‘de merhûm Mezid Bey Vakfı’na bi’l-fi‘l mütevellî olan râfi‘ü’l-kitâb Hasan Çelebi b. Mustafa mahzarında ikrâr edip emlâkimden mahalle-i mezbûrede vâki‘ bir tarafı Mustafa mülkü ve bir tarafı vâlidem Belkıs Hâtun mülkü ve ba‘zan Hüseyin Bey mülkü ve tarafeyni tarîk-i âm ile mahdûd iki bâb tahtânî oda ve bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil menzilimi cümle tevâbi‘iyle mütevellî-i mezbûr Hasan Çelebi’ye otuz beş kıt‘a esedî guruşa bi tarîki’l-istiğlâl bey‘ edip, ol dahi tarîk-i merkūm üzre iştirâ ve kabûl ve kabz, semen-i ma‘dûd ve teslîm-i mebî‘-i mahdûd kıldığımdan sonra yine mütevellî-i mezbûr menzil-i mahdûd-ı mezkûru ba‘de’t-tahliyeti’ş-şer‘iyye beher sene beş esedî guruş ve bir rub‘ guruşa târih-i kitâbdan üç senesi tamâmına değin on beş kıt‘a esedî guruş ile üç rub‘ guruşa bana îcâr ve teslîm ben dahi minvâl-i muharrer üzre istîcâr ve tesellüm ve kabûl ve kabz eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fî 27 min Şevvâl sene [10]81. Şuhûdü’l-hâl: Mehmed Efendi b. Sefer el-İmâm, Mustafa Halîfe b. el-Müezzin, Halil Beşe b. Musa, Abdülkādir Çelebi b. Hasan, el-Hâc Mehmed b. İsmail, Veli Beşe b. Kalender ve gayruhüm.