Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 128 Hüküm no: 140 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhum el-Hâc Osman’dan oğluna miras yoluyla intikal eden alacağın tahsil edildiği Medîne-i Hazret-i Ebâ Eyyûb el-Ensârî’de Câmi‘-i Kebîr mahallesinde sâkin Mehmed Çelebi b. el-Hâc Osman meclis-i şer‘de râfi‘ü’l-kitâb Hasan Çelebi b. Ali el-Hammâmî mahzarında ikrâr ve i‘tirâf edip mezbûr Hasan Çelebi’nin ammisi olup bundan akdem vefât eden el-Hâc Cafer, babam müteveffâ-yı mezbûr yedinden hâl-i hayâtında yüz yirmi kıt‘a esedî guruş istikrâz ve kabz edip işbu hâzır bi’l-meclis Şaban Çelebi b. ( ), mârrü’z-zikr yüz yirmi esedîye emriyle kefîl ve zâmin olmağın mezbûr el-Hâc Cafer fevt olup verâseti merkūm Hammâmî Hasan Çelebi’ye münhasıra olup babam merhûm el-Hâc Osman dahi mârrü’z-zikr yüz yirmi esedîyi kable’l-ahz fevt olup meblağ-ı mezbûr irsen bana isâbet ve intikāl etmişdi el-hâletü hâzihî meblağ-ı mezbûr yüz yirmi esedî guruşu kefîl-i mezbûr Şaban Çelebi ma‘rifetiyle mezbûr Hammâmî Hasan Çelebi yedinden bi’t-tamâm ahz u kabz edip zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şevvâl sene [10]81. Şuhûdü’l-hâl: Mahmud Bey b. Hamza, Ali Beşe b. Hüseyin, Abdullah b. Abdullah, Mustafa b. Ali, Hüseyin b. Ali, Mustafa Efendi b. Mehmed ve gayruhüm.