Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 328 Hüküm no: 372 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karabet v. Kanboli’nin, Demirci Şahin v. Serkis’e açtığı hırsızlık davasında, iddiasını ispat edemediği Vilâyet-i Anadolu’da Diyarbekir sancağında nefs-i kasaba-i Eğil ahâlîsinden Karabet v. Kanboli nâm Ermeni meclis-i şer‘-i hatîrde mahmiye-i İstanbul’da Manisalı Çelebi mahallesinde mütemekkin Demirci Şahin v. Serkis nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan beş gün mukaddem mezbûr Şahin ile ma‘an zikr olunan Manisalı Çelebi mahallesinde vâki‘ işbu hâzır bi’l-meclis Safer nâm Ermeni’nin dükkânına vardığımda mezbûr Şahin cüzdanım içinde mevcûd birkaç kıt‘a hüccet ve birkaç kıt‘a deyn temessükünü cüzdanı ile ma‘an ahz eylemişdir, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i merkūm Karabet’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ târih-i kitâbdan beş gün mukaddem merkūm Safer’in dükkânında müdde‘î-i merkūm Karabet’in birkaç kıt‘a hüccet ve birkaç kıt‘a deyn temessükünü cüzdanı ile ma‘an ahz u kabz etmediğine merkūm Şahin’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebince merkūm Karabet bilâ-beyyine müvecceh ta‘arruzundan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Hüseyin Çelebi b. Ebûbekir, Baba Resul b. Rıdvan, Gazanfer Bey b. Tevekkül, Mehmed b. Ramazan.