Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 132 Hüküm no: 147 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Abdullah’ın eski kocası Mehmed b. Mustafa ile boşanma davası Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Dökmecibaşı mahallesinde sâkine Saliha bt. Abdullah nâm hâtun meclis-i şer‘de zevc-i sâbıkı işbu râfi‘ü’l-kitâb Mehmed b. Mustafa mahzarında üzerine da‘vâ ve takrîr-i kelâm edip mezbûr Mehmed târih-i kitâbdan sekiz ay mukaddem beni tatlîk etmeğin zimmetinde mütekarrir ve ma‘kūdun-aleyh olan sekiz yüz akçe mehr-i müeccelimi taleb ederim suâl olunsun dedikde gıbbe’s-suâl mezbûr Mehmed cevâbında fi’l-vâki‘ müdde‘iye-i mezbûre mukaddemâ zevcem iken târih-i mezbûrda zimmetimde mütekarrir ve ma‘kūd olan sekiz yüz akçe mehr-i müeccelinden ve nafaka-i iddet ve me’ûnet-i süknâsından fâriğa olmak üzre huzûr-ı müslimînde benimle muhâla‘a etmeğin ben dahi hul‘-ı mezbûru kabûl ve birbirimizin zimmetini zevciyyete müte‘allika da‘vâdan ibrâ eylemişdik, deyicek isre’l-istintâk ve akībe’l-inkâr mezbûre Mehmed’den müdde‘âsını mübeyyine beyyine taleb olundukda udûl-i müslimînden olup yine mahalle-i mezbûre sâkinlerinden İbrahim Bey b. Ahmed ve Abdullah b. Veli nâm kimesneler li ecli’ş-şehâde makām-ı kazâya hâzırân olup isre’l-istişhâd fi’l-vâki‘ müdde‘iye-i mezbûre târih-i merkūmda zevci Mehmed ile sekiz yüz akçe mehr-i müeccelinden ve nafaka-i iddet ve me’ûnet-i süknâsından fâriğa olmak üzre bizim huzûrumuzda muhâla‘a eyleyip ol dahi hul‘-ı mezbûru kabûl ve ahadühümâ zevciyyete müte‘allika da‘vâdan âharın zimmetini ibrâ etmişlerdir, biz bu husûsa şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûre Saliha [meclis-i şer‘de] zevci merkūm Mehmed ile ber minvâl-i muharrer muhâla‘a eylediğini ikrâr ve i‘tirâf etmeğin bî-vech ta‘arruzdan men‘ birle kayd şud. Fî 23 min Zilka‘de sene [10]81. Şuhûdü’l-hâl: Hüseyin Çelebi b. Ali, Mehmed, Mahmud, Hasan b. Abdullah, Hüseyin b. Hasan.