Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 133 Hüküm no: 148 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Bt. Abdullah’ın kocasından kalan miras olan evi peşin parayla satışı Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de el-Hâc Hüsrev mahallesinde sâkin [iken] bundan akdem vefât eden Uzun Hasan b. Abdullah’ın verâseti zevce-i metrûkesi Rukiye bt. Abdullah ile sulbiye kebîre kızı Saliha nâm hâtun ve sulbî oğlunun oğlu Halil Çelebi ile oğlunun kızları Fâtıma ve Râbia nâm hâtunlara münhasıra olduğu şer‘an zâhir ve müte‘ayyin oldukdan sonra mezbûre Rukiye tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân olan mahalle-i mezbûre İmâmı Mustafa b. Hüseyin ve Mustafa Çelebi b. Hüseyin şehâdetleri ile şer‘an sâbite olan Halil Çelebi b. Hüseyin ve merkūm Halil Çelebi kendi tarafından asâleten ve mezbûretân Saliha ve Fâtıma taraflarından husûs-ı âti’l-beyân vekîli olup vekâleti kezâlik şâhidân-ı mezbûrân şehâdetleri ile şer‘an sâbite olmağın vekâleten mezbûre Râbia Hâtun tarafından kezâlik şâhidân-ı mezbûrân şehâdetleri ile vekâleti sâbite olan Ahmed Efendi b. eş-Şeyh Ali vekâleten meclis-i şer‘de işbu sâhibü’l-kitâb Osman Çelebi b. İbrahim mahzarında her biri bi’l-asâle ve bi’l-vekâle ikrâr ve i‘tirâf edip müteveffâ-yı mezbûrun muhallefâtından olup bi’l-irsi’ş-şer‘î verese-i mezkûrîne isâbet eden emlâkimden mahalle-i mezbûrede vâki‘ bir tarafı Halil Çelebi mülkü ve bir tarafı Saliha Hâtun mülkü ve bir tarafı mekābir-i müslimîn ve bir tarafı tarîk-i âm ile mahdûd dört bâb fevkānî ve bir bâb tahtânî odalar ve bi’r-i mâ ve havluyu ve kenîfi müştemil mülk menzili bi cümleti’t-tevâbi‘ ba‘de’l-müzâyede ve inkıtâ‘i’r-rağbe mezbûr Osman Çelebi’ye on altı bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile her biri bi’l-asâle ve bi’l-vekâle bey‘ ve teslîm ol dahi minvâl-i muharrer iştirâ ve tesellüm ve kabûl ve kabz eyledikden sonra semeni olan meblağ mârrü’z-zikr on altı bin akçeyi yedinden tamâmen her birimiz bi’l-asâle ve bi’l-vekâle ahz u kabz eyleyip ba‘de’l-yevm menzil-i mahdûd-ı mezkûrda alâka ve medhalim yoktur merkūm Osman Çelebi’nin mülk-i müşterâsıdır mutasarrıf olsun [deyicek] kayd şud. Fî 5 min Zilka‘de sene [10]81. Şuhûdü’l-hâl: Mustafa Çelebi b. Mehmed, Ali b. Mehmed, Ahmed b. Mustafa, Cafer Çelebi, Mehmed Beşe. Vaka‘a’l-emr ( ) hâkezâ nemekahu’l-fakīr ileyhi sübhânehû eş-Şeyh Ebû Bekir b. Mustafa el-müvellâ hilâfe be mahkeme-i Çatalca.