Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 133 Hüküm no: 149 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çatalca’da Cündî Hüseyin Bey b. Hasan’ın arazisine yapılan haksız tasarrufun men‘i Husûs-ı âti’z-zikrin mahallinde istimâ‘ı için fermân-ı şerîf vârid olmağın imtisâlen lehû bu fakîr dahi zeyl-i vesîkada mastûrü’l-esâmî olan cemm-i gafîr müslimîn ile Havâss-ı aliyye muzâfâtından Çatalca nâhiyesine tâbi‘ Karamurad nâm karye mer‘âsı olan İncegiz yolu demekle müte‘âref tarîk-i âmdan Dilsüz tarlası demekle meşhûr tarla beyninde olan kışlak ve yaylak ta‘bîr olunur mer‘âya varılıp akd-i meclis-i hatîr olundukda zikr olunan karye-i [Kara]murad ahâlîsinden Hüseyin Bey b. Hasan Bey nâm cündî meclis-i ma‘kūd-ı mezbûrda, karye-i mezbûre kurbunda olup Silivri nâhiyesine tâbi‘ Kadı nâm karye ahâlîsinden Süleyman Bey b. Halil ve Ahmed Bey b. Muharrem ve Receb Beşe b. Hızır ve Hüseyin Çelebi b. Ahmed ve Musli b. Ali ve Mehmed Çelebi b. Yusuf ve Ali Çelebi b. Yusuf ve Mehmed b. Abdullah ve Mustafa b. Selim ve Hasan Çelebi b. Abdülkerim ve Hüseyin b. Hasan ve sâir ahâli-i karye-i mezbûre muvâcehelerinde üzerlerine da‘vâ ve takrîr-i kelâm edip zikr olunan İncegiz tarîkinden sâlifü’z-zikr Dilsüz tarlasıyla müte‘âref olan mevzi‘ beyninde vâki‘ cemî‘ tarla ve çayır Hadımyeri demekle meşhûr olup dedem ( ) nâm kimesne tasarrufunda olup ba‘dehû babam mezbûr Hasan Bey’e intikā[l] olunmuş, yetmiş sene mikdârı babam merkūm Hasan Bey tasarruf ve zirâ‘at ve harâset ve kışlak ve yaylak ve sıvâd edip ba‘dehû bana intikāl ve ben dahi minvâl-i meşrûh üzre elli senedir harâset ve zirâ‘at ve kışlak ve yaylak ve sıvâd edip a‘şâr-ı şer‘iyyesin vakıf zâbitlerine edâ ve teslîm ederken hâlen bu sene karye-i mezbûre Kadı ahâlîleri olan merkūmûn mevzi‘-i mezbûrede olan kışlak ve yaylak ve sıvâdda bizim hissemiz vardır deyû beni men‘ murâd ederler suâl olunup bî-vech ta‘arruzdan men‘ olunmak matlûbumdur dedikde gıbbe’s-suâl karye-i mezbûre ahâlîleri olan merkūmun cevâblarında fi’l-vâki‘ mevzi‘-i mezbûrda olan cemî‘ tarla ve çayır ve savâd ebâ an ceddin merkūm Hüseyin Bey’in taht-ı tasarrufunda olup kimesnenin medhali olmadığını her biri ikrâr lâkin hakk-ı kışlak ve yaylak tasarrufunda kadîmî olduğunu inkâr edicek müdde‘î-i merkūmdan müdde‘âsını mübeyyine beyyine taleb olundukda udûl-i müslimînden olup civârlarında olan İnceğiz’den Mahmud Hoca b. Mustafa ve Mustafa b. Sinan ve Mehmed b. Mustafa ve Ayaviran nâm karyeden müsin ve ihtiyâr Müezzin Abdülkerim Halîfe b. Süleyman ve Ali Çelebi b. Süleyman nâm ihtiyârlar li ecli’ş-şehâde makām-ı kazâda hâzırûn olup fi’l-vâki‘ arâzi-i merkūmede olan kışlak ve yaylak ve sıvâd kadîmü’l-eyyâmdan bu âna gelince merkūm Hüseyin Bey’in ebâ an ceddin kışlak ve yaylakdır, âhardan mezbûrûnun bir vechile alâka ve medhalleri yoktur, biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın karye-i Karamurad ahâlîleri olan merkūmûn men‘ birle kayd şud. Fî 24 min Şevvâl [10]81. Şuhûdü’l-hâl: Veli, Ramazan Çelebi, Hasan b. Abdullah, İsmail b. İbrahim, Mehmed Beşe b. Hasan el-Mübâşir, Hüseyin Beşe b. Hasan, Ali Bey b. Abdülmu‘în, Ali Beşe b. Ahmed Çukadâr-ı Hazret-i Efendi, Mustafa Ağa b. Mehmed Kethüdâ.