Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 328 Hüküm no: 373 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hatun’un elinde olan evin iç bölümüyle duvarın ölen kocası Mustafa tarafından el-Hâc Mehmed b. Zülfikar’a satıldığının tespiti Husûs-ı âti’l-beyânın mahallinde istimâ‘ ve tahrîri için gıbbe’l-iltimâ[s] kıbel-i şer‘-i kavîmden mevlânâ Mehmed Efendi b. Abdülbâkī irsâl olunup ol dahi hâssa mi‘mârlardan Burse[v]î üstâd Ali Halîfe b. Abdullah ve diğer Ali Halîfe b. Abdülmennân ile mahmiye-i İstanbul’da Seyyid Ömer mahallesinde vâki‘ el-Hâc Mehmed b. Zülfikār nâm kimesnenin sâkin olduğu menziline varıp zeyl-i kitâbda mastûrü’l-esâmî olan müslimîn huzûrunda akd-i meclis-i şer‘-i hatîr eyledikde merkūm el-Hâc Mehmed meclis-i ma‘kūd-ı mezbûrda mahalle-i mezkûre sükkânından [51b] olup bundan [akdem] vefât eden Mustafa b. Abdülkerim’in zevce-i metrûkesi Râbia Hâtun ile sulbiye sagīre kızı Fâtıma’ya münhasıra ve merkūme Râbia sagīre-i mezbûrenin tesviye-i umûruna kıbel-i şer‘den mansûbe vasîsi olmağla tereke-i müteveffâ-yı mezbûreden olmak üzre zikri âtî duvara asâleten ve vesâyeten vâzı‘atü’l-yed olduğu şer‘an zâhir ve mütehakkik oldukdan sonra merkūme Râbia’nın zevci ve tarafından husûsü’l-beyânı vekîl-i müsecceli olan odabaşı Mustafa Beşe b. Hüseyin mahzarında üzerine da‘vâ ve takrîr-i kelâm edip müteveffâ-yı merkūm Mustafa hâl-i hayâtında yedinde mülkü olan işbu menzilin dâhiliyyesi ile işbu üç zirâ‘ altı parmak duvarı yirmi bir bin akçeye bin altmış yedi târihinde bana bey‘ ve teslîm ben dahi vech-i muharrer üzre iştirâ ve tesellüm edip mülk-i müşterâm olmuşken müvekkile-i mezbûre Râbia Hâtun mârrü’z-zikr duvara bi gayrı hakkın vaz‘-ı yed eder vekîl-i merkūm odabaşı Mustafa Beşe’den suâl olunup müvekkilesinin ol duvarından kasr-ı yedine tenbîh olunması matlûbumdur dedikde gıbbe’s-suâl vekîl-i merkūm cevâbında müteveffâ-yı merkūm Mustafa vech-i muharrer üzre mârrü’z-zikr duvarı menzil-i mezbûrun dâhiliyyesi ile ma‘an müdde‘î-i merkūm Hacı Mehmed’e bey‘ eylediği müvekkilemin ma‘lûmu değildir deyû inkâr edicek müdde‘î-i merkūm Hacı Mehmed’den müdde‘âsını mübeyyine beyyine taleb olundukda udûl-i müslimînden olup mahalle-i mezbûre imâmı olan Ahmed Efendi b. Nurullah ve İbrahim Halîfe b. Halil el-Müezzin ve Hasan b. Mehmed ve Kayyım Osman b. Mehmed ve Abdülkādir Ağa b. Ali ve Hasan Beşe b. Abdullah nâm kimesneler li ecli’ş-şehâde meclis-i şer‘a hâzırûn olup istişhâd olunduklarından fi’l-hakīka müteveffâ-yı mezbûr Mustafa hâl-i hayâtında yedinde mülkü olan işbu menzilin dâhiliyyesi ile ma‘an işbu üç zirâ‘ altı parmak duvarı yirmi bir bin akçeye bin altmış yedi târihinde müdde‘î-i merkūm Hacı Mehmed’e bizim huzûrumuzda bey‘ ve teslîm edip ol dahi vech-i muharrer üzre iştirâ ve tesellüm etmişidi, biz bu husûsa bu vech üzre şâhidleriz şehâdetimiz mûcebince [şehâdet] dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle oldukdan sonra vekîl-i mezbûra mârrü’z-zikr duvardan müvekkilesinin kasr-ı yedine tenbîh ettiğini mevlânâ-yı merkūm tahrîr ba‘dehû ma‘an irsâl olunan Bayram b. Abdullah ile meclis-i şer‘a gelip alâ vukū‘ihî inhâ ve takrîr etmeğin mevlânâ-yı mezbûrun vech-i muharrer üzre olan hükmü tenfîz olunup mâ vaka‘a bi’t-taleb ketb olundu. Fî gurreti Recebi’l-ferd li sene seb‘a ve seb‘în ve elf. Şuhûdü’l-hâl: Mehmed b. Mustafa el-Kayyım, Mehmed Beşe b. İbrahim, Mustafa b. Süleyman, Hasan Çelebi b. Mehmed ve gayruhüm.