Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 139 Hüküm no: 157 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melek Ahmed Paşa Vakfı’nın mütevellisi Hüseyin Çelebi b. Ahmed’in Hüseyin Ağa b. İbrahim’e istiğlâl usulüyle mülk satışı Medîne-i Hazret-i Ebâ Eyyûb el-Ensârî -radiye anhü’l-Bârî-de Kiremitçi Süleyman Çelebi mahallesinde sâkin Hüseyin Çelebi b. Ahmed meclis-i şer‘de merhûm Melek Ahmed Paşa Vakfı’nın nükūd-ı mevkūfesine mütevellî olan sâhibü’l-kitâb Hüseyin Ağa b. İbrahim mahzarında ikrâr ve i‘tirâf edip silk-i mülk-i sahîhimde münselik emlâkimden mahalle-i mezbûrede vâki‘ bir tarafı Halil Çelebi mülkü ve bir tarafı Hatice Hâtun mülkü ve bir tarafı Acem Çavuş Vakfı ve bir tarafı tarîk-i hâs ile mahdûd iki bâb fevkānî ve iki bâb tahtânî odaları ve bi’r-i mâ’ı müştemil menzilimi cemî‘ tevâbi‘ ve levâhıkı ile mütevellî-i mezbûr Hüseyin Ağa’ya yüz doksan kıt‘a esedî guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile tarîk-i merkūm üzre iştirâ ve kabûl ve kabz-ı semen-i ma‘dûd ve teslîm-i mebî‘-i mahdûd kıldığımdan sonra yine mütevellî-i mezbûr, menzil-i mahdûd-ı mezkûru ba‘de’t-tahliyeti’ş-şer‘iyye târih-i kitâbdan bir sene tamâmına değin yirmi sekiz buçuk kıt‘a esedî guruşa bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ kayd şud. Fî 11 min Zilka‘deti’ş-şerîfe sene [10]81. Şuhûdü’l-hâl: Mehmed Efendi b. Yusuf, Mustafa Beşe b. İbrahim, Halil Çelebi, Hüseyin b. Veli, Hasan b. Mustafa, Hüseyin b. Ali ve gayruhüm.