Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 139 Hüküm no: 158 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mütevelli Ahmed b. Yusuf’un Hilmi b. Abdülvehhab ile olan alacak davasının reddi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de merhûm el-Hâc…? nâm sâhibü’l-hayrın nükūd-ı mevkūfesine bi’l-fi‘l mütevellî olan İmâm Ahmed Efendi b. Yusuf mahfil-i kazâda …? medîne-i mezbûre lebbânlarından işbu bâ‘isü’l-kitâb …? b. Abdülvehhâb mahzarında üzerine bi’l-velâye da‘vâ ve takrîr-i kelâm edip mâl-ı vakf-ı mezbûrdan merkūm Ahmed Beşe zimmetinde mütevellî-i sâbık Attârzâde el-Hâc Mustafa yediyle menzil semeninden olmak üzre onu on bir buçuk hesâbı üzre devr-i şer‘î ve ilzâm-ı ribh olunan altı bin akçeyi hâlâ vakf-ı mezbûr için tevliyyetim hasebiyle merkūm Ahmed Beşe’den taleb eylediğimde teslîmden imtinâ‘ eder suâl olunsun deyicek gıbbe’s-suâl ve akībe’l-inkâr mütevellî-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin zimmetinde mâl-ı vakf-ı mezbûrdan ber minvâl-i muharrer altı bin akçe zimmetinde vakf-ı mezbûra deyni olmadığınan mezbûr Ahmed Beşe[’ye] yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin ile’l-isbât mütevellî-i mezbûru bî-vech ta‘arruzdan men‘ birle mâ cerâ bi’t-taleb ketb olundu. Fi’l-hâdî aşer min Zilka‘deti’ş-şerîfe sene ihdâ ve semânîn ve elf. Şuhûdü’l-hâl: Ahmed Beşe Çukadâr, Mustafa Efendi b. İsmail, Eyüb Çelebi el-müsta‘id, Mehmed b. Mahmud, Ali b. Abdullah, Hüseyin b. Hasan ve gayruhüm.