Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 140 Hüküm no: 160 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali adlı yetimin tasarrufunda bulunan Davud Ağa Vakfı’na ait odanın devri için annesi Fâtıma Hatun’a izin verildiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Koca Kasımpaşa mahallesinde sâkine olup sadrî sagīr oğlu Ali’nin tesviye-i umûru için kıbel-i şer‘den mansûb vasîsi olan bâ‘isetü’l-kitâb Fâtıma bt. Ahmed nâm hâtundan ale’l-vechi’l-âtî da‘vâ ve istihbâr-ı şer‘î sudûrundan sonra udûl-i ricâlden mahalle-i mezbûrede sâkin Ramazan Beşe b. Şaban ve Halil b. Receb ve Mustafa Beşe b. Ali nâm kimesneler meclis-i şer‘-i hatîre li ecli’l-ihbâr hâzırûn olup isre’l-istihbâr mezbûre Fâtıma’nın ile’l-ân hucr u terbiyesinde olan sadrî sagīr oğlu Ali’nin merhûm Davud Ağa Evkāfı’ndan icâre-i mu‘accele ve ücret-i müeccele-i ma‘lûmeteyn ile babası müteveffâ-yı mezbûr ( ) dan intikāl-i âdî ile müntakil lede’l-ahâlî ma‘lûmü’l-hudûd bir bâb odadan gayri ism-i mâl ıtlâk olunur bir nesnesi olmayıp nafaka ve kisveye eşedd-i ihtiyâc ile muhtâc idiği ma‘lûmumuzdur zikr olunan oda dahi âhara ferâğ bir nice zamân kalırsa ta‘mîre adem-i iktidârdan nâşî harâb olmak emr-i mukarrerdir sagīr-i mezbûrun zarûreten nafakasını her biri alâ tarîki’ş-şehâde haber vermeğin hâkim-i muvakki‘-i sadr-ı kitâb hazretleri dahi mârrü’z-zikr odayı bedel-i misliyle âhara ferâğ ve bedelini i‘mâl ve murâbahasıyla sagīre-i mezbûreyi infâk ve iksâya vâlidesi mezbûre Fâtıma’ya izin birle mâ vaka‘a kayd şud. Fî 11 min Zilka‘de sene [10]81. Şuhûdü’l-hâl: Ahmed Beşe Çukadâr, Mustafa Efendi b. İsmail, Mehmed b. Mahmud, Hasan b. Abdullah ve gayruhüm.