Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 141 Hüküm no: 161 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos’un Kurd köyünden Nurullah Bey b. Hasan’ın çiftlik, eşya ve hayvanlarını Abdülvehhab Çelebi b. Hızır’a satması Mahmiye-i İstanbul’da Bezzâz Reis mahallesinde sâkin Nurullah Bey b. Hasan meclis-i şer‘-i şerîfde işbu râfi‘ü’l-kitâb Abdülvehhâb Çelebi b. Hızır mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i [sahîhimde] münselik emlâkimden Havâss-ı aliyye kazâsı tevâbi‘inden Terkos nâhiyesine tâbi‘ Kurd nâm karyede vâki‘ bir tarafı mezbûr Abdülvehhâb Çelebi’nin âhar mülkü ve bir tarafı sâhil-i bahr ve iki tarafı tarîk-i âm ile mahdûd üç bâb tahtânî oda ve bir anbar ve iki karşılık ahır ve iki sundurma ve bi’r-i mâ ve fırın ve iki dönüm mikdârı bağ ve harman yerini müştemil çiftlik ta‘bîr olunur menzilimde olan dört hisseden bir hisse-i şâyi‘amı cemî‘ tevâbi‘iyle ve içinde mevcûd iki çift su sığır öküzü ve iki su sığır ineği ve iki su sığır danası ve bir çift kara sığır öküzü ve on aded kara sığır ineği ve danalarından ve iki araba ve üç saban demiri ve bir kebîr saban demiri ve bir kazgan ve bir pekmez tâbesi ve bir şarabhânede dahi dört hisseden bir hissemi mezbûr Abdülvehhâb Çelebi’ye bi safkatin vâhidetin on sekiz bin fıddî akçeye tarafeynden îcâb ve kabûl[ü hâvî] bey‘-i bâtt-ı sahîh-i şer‘ ile bey‘ ve teslîm ol dahi vech-i muharrer üzre iştirâ ve tesellüm ve kabz eyledikden sonra merhûm Kilârî Süleyman Bey Evkāfı arâzisinden olup zabt ve taht-ı tasarrufumda olup zikr olunan çiftliğe intimâ‘ ile tahdîd ve tavsîfden müstağnî tefvîz-i âti’z-zikrin sudûruna değin karye-i mezbûrede mevâzi‘-i adîdede vâki‘ tahmînen seksen müd tohum isti‘âb eder tarlalardan bir kıt‘a çayırda olan dört hisseden üç hissemi kezâlik mezbûr Abdülvehhâb Çelebi’ye bi izni’l-mütevellî dört bin akçe bedel mukābelesinde tefvîz bi’l-ferâğ eylediğimde ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an yirmi iki bin akçeyi yedinden bi’t-tamâm ve’l-kemâl ahz u kabz eyledim, min ba‘d emlâk-i mezbûrede ve eşyâlarda olan dört hisseden bir hissede alâkam kalmadı ve arâzi-i mezbûrda olan dört hisseden üç hisse dahi mezbûr Abdülvehhâb Çelebi’nin dâhil-i taht-ı tasarrufu olmuşdur Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ ketb olundu. Fî 12 min Zilka‘deti’ş-şerîfe sene [10]81. Şuhûdü’l-hâl: Hüseyin Bey b. Yakub, Affan b. İbrahim, Şaban b. Fazlı, Hasan Efendi b. Hüseyin, Hüseyin b. Ali ve gayruhüm.