Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 142 Hüküm no: 163 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikite v. Teofilo’nun Mizistre’de Hızır İlyas Kilisesi Vakfı’na bahçeli ev ve bağ satışı Vilâyet-i Rumeli’nde Mizistre kazâsına tâbi‘ Krense nâm karye sâkinlerinden Nikite v. Teofilo nâm zimmî mahfil-i şer‘de karye-i mezbûre zimmîlerine mahsûs Hızır İlyas demekle ma‘rûf kenîse evkāfına mütevellî olan râfi‘ü’l-vesîka Papa Yuvaşe v. Yorgi nâm râhib muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı İstirati mülkü ve bir tarafı Yanaki mülkü ve bir tarafı İlya mülkü ve taraf-ı âharı tarîk-i âm ile mahdûd bir bâb tahtânî oda ve altında bostanı ve etrâfında eşcâr-ı müsmire ve gayr-ı müsmireyi cemî‘ tevâbi‘ ve levâhıkıyla yine karye-i mezbûre sınırı dâhilinde mevâzi‘-i müteferrikada vâki‘ inde’l-ahâlî ve’l-cîrân ma‘lûmü’l-hudûd ve’l-aded dut ve zeytin ve pelit eşcârını bi cümleti’l-hukūk ve’l-levâhık mütevellî-i mezbûr Papa Yuvaşe’ye kırk kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi mâl-ı vakf-ı mezbûre ile vakf-ı mezkûr için bi’l-velâye iştirâ ve kabûl eyledikden sonra karye-i mezbûre sınırı dâhilinde mevâzi‘-i adîdede vâki‘ tefvîz-i âtî sudûruna değin zabt ve taht-ı tasarrufumda olup her birinin hudûdu inde’l-ahâlî ve’l-cîrân ma‘lûm on kıt‘a tarlalarımın dahi hakk-ı tasarruflarını ma‘rifet-i sâhibü’l-arz ile mütevellî-i merkūma yirmi kıt‘a esedî guruş bedel mukābelesinde tefvîz bi’l-ferâğ edip ol dahi tefevvuz ve kabûl eylediğinde semen-i mezbûr ile bedel-i merkūm cem‘an altmış kıt‘a esedî guruşu mâl-ı vakf-ı mezbûrdan olmak üzre mütevellî-i mesfûr yedinden tamâmen alıp kabz edip emlâk-i mezbûre ve arâzi-i merkūmeyi mahallinde zabt ve tasarrufa tarafımdan mütevellî-i mezbûr Yuvaşe’yi taslît eyledim dedikde gıbbe’t-tasdîki’ş-şer‘îyyi’l-vicâhi’l-mu‘teber mâ cerâ bi’t-taleb ketb olundu. Fi’l-yevmi’r-râbi‘-i aşer min Zilka‘deti’ş-şerîfe sene [10]81. Şuhûdü’l-hâl: Ahmed Çelebi b. Mehmed, Osman b. Abdullah, Şaban b. Abdullah, Mehmed b. Mahmud, Dilaver b. Abdullah, Hasan b. Abdullah ve gayruhüm, Todori v. Nikola, Yorgaki v. Nikite, Todori v. Dimo, Petro v. Dimitri, Kiryazi v. Polihroni, Yano v. Todori, Panayot v. İlya, Polihroni v. Polihroni, Yanaki v. Nikite, Todori v. Dimo, Yamandi v. Kostantin ve gayruhüm.